KAMATI YA BUNGE YATEMBELEA MAENEO YALIYOATHIRIKA NA MAFURIKO RUFIJI

Posted on: August 16th, 2024

Kamati ya Kudumu ya Bunge ya Maji na Mazingira wametembelaea maeneo yaliyoathirika na mafuriko katika Kata ya Mohoro Wilayani Rufiji, ambapo walitembelea Shule ya Msingi Mohoro, Kituo cha Afya Mohoro pamoja na kuangalia eneo ambapo limetengwa na serikali kwa ajili ya kugawa viwanja kwa Wananchi wa Kata ya Mohoro ambao walikuwa wanaishi kwenye maeneo ya njia ya maji (mabondeni).

Kamati hiyo ilifanya ziara Ijumaa Agosti 16, 2024 pamoja na kuzungumza na Wananchi katika Kijiji cha Shela Kata ya Mohoro baada ya Kamati hiyo kuangalia maeneo yaliyoathirika na mafuriko na kutoa pole kwa Wananchi, huku Mwenyekiti  wa Kamati ya Kudumu ya Bunge  Maji na Mazingira  Jackson Kiswaga aliwataka Wananchi kuchangamkia fursa ya Viwanja vilivyoanza kugaiwa na Seikali na kutoka maeneo ya mabondeni ili kuepuka athari za mafuriko.

Kwa upande wake Mwenyekiti wa Halmashauri ya Wilaya ya Rufiji Mhe. Abdul Chobo aliomba Serikali iwasaidie kuwaongezea viwanja ili Wananchi waliokuwa wanaishi kwenye maeneo ya mabondeni waweze kuhama katika maeneo hayo na kuepuka athari ya mafuriko.

“viwanja  vimepata Vijiji viwili Kijiji cha Shela na Kijiji cha King’ongo lakini Mohoro Mashariki na Mohoro Magharibi hata Mwananchi mmoja hajapata Kiwanja, tunakuomba Mwenyekiti wa Kamati (Kamati ya kudumu ya Bunge ya Maji na Mazingira) uondoke na hili ili Serikali itusaidie kupatata Kiwanja”

“tumesikia Wananchi wakisaidiwa kupelekewa misaada ya kujengewa majumba, tumesikia Wananchi wakijengewa majumba ya kukopeshwa ili walipe kidogo kidogo, tunaomba  na sisi tusaidiwe kwasababu hali zetu ni ngumu” aliongeza Mhe. Chobo huku kushangiliwa na mamia ya Wananchi.

 Akilizungumzia jambo hilo Mwenyekiti wa Kamati ya Kudumu ya Bunge  Maji na Mazingira Mhe.  Jackson Kiswaga alisema swala hilo wamelichukua  na wanakwenda kulifanyia kazi huku akiwataka Wananchi kuchangamkia fursa ya Viwanja vilivyoanza kugaiwa na Seikali na kutoka maeneo ya mabondeni ili kuepuka athari za mafuriko.

Naye Naibu Waziri Ofisi ya Makamu wa Rais Muungano na Mazingira Khamis  Hamza Khamis amepiga marufuku  tabia ya ukati wa miti ovyo pamoja kufanya shughuli za kibinadamu ikiwemo uvuvi.

Mkuu wa Mkoa wa Pwani Abubakar Kunenge pamoja na Kaimu Mkuu wa Wilaya ya Rufiji ambaye ni Mkuu wa Wilaya ya Kibiti Kanal Joseph Kolombo walikuwa wenyeji wa kuitembeza Kamati hiyo katika maeneoyaliyoathirika na mafuriko.

Mohoro ni moja ya kati ya Kata 13 za Rufiji zilizoathirika na mafuriko yaliyotokana  na mvua kubwa zilizonyesha mapema mwaka huu ambapo katika kukabiliana na changamoto hizo  Mpaka sasa Serikali imeshatenga viwanja takribani 600 bure kwa ajli ya Wananchi wa Kata ya Mohoro ikiwa ni pamoja na eneo la kujengwa Shule mpya ya msingi pamoja na Kituo cha Aya.