HALMASHAURI ZA KIJIJI ZAONYWA KUPOKEA FEDHA ZA WAWEKEZAJI ILI KUFANYA MAAMUZI

Posted on: March 24th, 2023

Na. Emmanuel Kapandila - Mloka, Rufiji.

MKuu wa Wilaya ya Rufiji  Mhe. Meja Edward Gowele ameonya vikali mwenendo wa Halmashauri za Vijiji kupokea fedha kutoka Kwa Watu ambao husubiri maamuzi ya Halmashauri hizo vitendo ambavyo huathiri maamuzi ya Halmashauri hususani katika maswala yanayohitaji kuzingatia maslahi mapana ya Wananchi.

Meja Gowele ameyasema hayo Leo Machi 24.2023 Wakati akizungumza na wajumbe wa Halmashauri ya Kijiji Cha Mloka Wilaya ya Rufiji Mkoani Pwani ambao walifanya maamuzi ya kutaka kumilikisha ardhi Kwa Mwekezaji kinyume Cha utaratibu.

" ni lazima tufahamu kuwa maamuzi ya Halmashauri ya Kijiji yanabeba maslahi mapana ya Wanakijiji hivyo hayatakiwi kufanywa Kwa ushawishi wa aina yoyote" alisisitiza Mhe. Gowele

Kupitia Kikao hicho Meja Gowele amewataka  Wajumbe kurudisha fedha kiasi Cha Shilingi Milioni Moja waliyolipwa na Mwekezaji mpangaji Ili wakae Kikao Cha kujadili na kupitisha ombi la Mwekezaji aliyepanga ardhi ya Kijiji hicho kupimiwa eneo alilopangishwa wakati Kijiji hicho kina mapato ambayo yangeweza kuendesha Kikao hicho.

" wote mmekiri Kwa maandishi kuwa mlipokea fedha Kwa Mwekezaji na mkagawana Ili mkae Kikao. fedha hiyo haikuwekwa kwenye akaunti ya Kijiji. na kwanini mchukue pesa yake ndo mfanye Kikao wakati Kijiji Kina mapato? hivyo ni vitendo vya Rushwa ambavyo haviwezi kuwaongoza kwenye maamuzi sahihi. kufikia tarehe thelathini pesa yote iwe imerudishwa." alisisitiza Meja Gowele

Hata hivyo, kufuatia tukio Hilo amezitaka Halmashauri zote za Kijiji kutoingia  mikataba na Wawekezaji bila kuhusisha Halmashauri ya Wilaya Ili ikaguliwe na kuhakikisha mikataba hiyo inaleta tija Kwa Wananchi wa Vijiji husika.

Aidha ameagiza kupitiwa Kwa mikataba 32 ya wawekezaji wote wa makambi ya Kitalii Kijijini  hapo Ili kuhakiki uhalali wa mikataba hiyo.