HAFLA YA UTIAJI SAINI BARABARA YA UTETE-NYAMWAGE

Posted on: March 20th, 2023

Serikali kupitia wakala wa barabara Tanzania (TANROADS) imeingia mkataba na Kampuni ya China Railways Seventh Group Limited kutekeleza ujenzi wa barabara ya Utete -Nyamwage yenye urefu wa kilometa 33.7.

Pia serikali kupitia wakala huo,imeingia mkataba na Kampuni ya Nyanza Roads Works , kwa ajili ya ujenzi wa daraja la Mbambe lenye urefu wa mita 81 na barabara unganishi kilometa 3.0 kwa kiwango cha lami , miradi ambayo itagharimu zaidi ya Shilingi Bilioni 67 hadi kukamilika kwake.

Zoezi la utiaji saini wa mikataba ya ujenzi wa Barabara na Daraja hilo, umefanyika katika viwanja vya Azimio Utete wilayani Rufiji mkoani Pwani, ambapo umefanyika kati ya Mtendaji Mkuu wa Wakala wa barabara (TANROADS) Mhandisi Rogatus Matavila. 

Akizungumza baada ya zoezi hilo, Naibu Waziri wa Ujenzi na Uchukuzi Mhandisi Godfrey Kasekenya ameeleza, gharama za ujenzi wa barabara ya Utete-Nyamwage na Daraja la Mbambe zitagharamiwa na Serikali ya Tanzania kwa asilimia 100.

Kasekenya aliiagiza TANROADS kusimamia ujenzi huo na kuhakikisha unakamilika kwa wakati na kuzingatia thamani ya fedha.

Awali akitoa taarifa ya mradi huo , katika hafla ya utiaji saini wa mikataba ya ujenzi wa barabara hiyo, Mtendaji Mkuu wa Wakala wa Barabara nchini (TANROAD) Mhandisi Rogatus Matavila amesema, mkataba wa barabara ya Utete-Nyamwage ni moja ya mkakati wa Serikali kuharakisha maendeleo ya Rufiji ili kuboresha sekta ya usafiri na usafirishaji.