GOWELE: TUTENGE MAENEO KWA AJILI YA UWEKEZAJI, KILIMO, MAKAZI

Posted on: July 2nd, 2024

Mkuu wa Wilaya ya Rufiji Meja Edward Gowele, amezitaka halmashauri za vijiji na Vitongoji kutenga maeneo ya uwekezaji, kilimo pamoja na makazi ili kuepuka migogoro baina ya Kijiji na wawekezaji wanaowekeza katika maeneo mbalimbali Wilayani Rufiji.

Gowele amesema kutenga maeneo hayo kutasaidia Wananchi kujua maeneo rasmi ya kilimo hali itakayosaidia kutovamia maeneo yaliyotengwa kwa ajili ya uwekezaji na kufanya kufanya shughuli za kilimo.

‘’hatuwezi kukataa uwekezaji, tutenge eneo kwa ajili ya uwekezaji, kwa ambao watafanya uwekezaji, tuwe na eneo la kilimo na tuwe na eneo la makazi’’ alisema DC Gowele.

Gowele aliyazungumza hayo katika kikao na Wananchi wa Kitongoji cha Siasa Nyamakulukulu iliyopo Kata ya Utete Wilayani Rufiji leo Jumanne Julai 2, 2024 baada ya kupokea malalamiko ya Wananchi wa Kitongoji hicho kuwa kuna Muwekezaji katika eneo hilo ameweka bikoni (alama za mipaka) katika makazi ya Wananchi na kwenye mashamba yao.

Katika kutafuta namna bora ya kutatua mgogoro huo DC Gowele ameunda kamati maalumu ya ufuatiliaji na upimaji wa eneo alilopewa mwekezaji awali, ili kubaini ukubwa wa ardhi iliyoombwa Wakati huo, ikilinganishwa na idadi ya wakazi wa Kijiji hicho Kwa Sasa kisha kutoa mrejesho Kwa wanakijiji ili waweze kutoa eneo la uwekezaji bila kuathiri makazi na maeneo ya kilimo kwa wanakijiji hao.

"na muwekezaji awe tayari kupunguza eneo baada ya kulihakiki, eneo lichorwe upya, hizo bikoni zilizowekwa huko mimi sizitambui, zitoke muanze upya kwa kushirikana na Kamati niliyounda hapa’’ alisema Meja.

Pia Gowele amewataka Wananchi wanaofanya shughuliza kilimo katika maeneo ya uwekezaji wa Kijiji au Kitongoji waombe kwa kufuata taratibu za Kijiji husika.

"wajibu wangu ni kusimamia, na kama unazo heka 200 utatuambia umepata wapi! Kama ulipewa kwa utaratibu wa Kijiji, Kijiji kina uwezo wa kutoa mwisho heka 50’’ alisema DC.

Mbali na hayo pia, Mkuu huyo amepiga marufuku uuzaji wa pombe za kienyeji majumbani kwasababu itasababisha mmonyoko wa maadili kwa Watoto, huku akiwataka kuwa na eneo maalumu litakalotambulika kwa ajili ya biashara hiyo.