GOWELE AKEMEA UKATILI KWA WATOTO

Posted on: June 17th, 2024

Mkuu wa Wilaya ya Rufiji Mhe. Meja Edward Gowele amekemea tabia ya ukatili dhidi ya Watoto ukiwemo, ubakaji, ulawiti, tabia ya kupiga watoto kupita kiasi, na mauji ya Watoto, na kuitaka jamii kutoa taarifa katika serikali za vijiji au Vitongoji, polisi na katika madawati ya jinsi na Watoto, endapo wataona Mtoto anafanyiwa vitendo hivyo katika jamii.

Gowele alikemea mambo hayo wakati akihutubia katika siku ya maadhimisho ya Mtoto wa Afrika jana Juni 16, 2024 yaliyofanyika katika ukumbi wa Chuo cha Maendeleo ya Wananchi FDC-Ikwiriri.

“kuna mambo mengi ya kikatili ambayo Watoto wanafanyiwa, Watoto wengi wanalawitiwa, Watoto wanabakwa, lakini Watoto wanapigwa kupita kiasi na kuna Watoto ambao wanauwawa. Si vitendo vizuru sana dhidi ya Watoto, hayo yote ni ukatili dhidi ya Mtoto. Hawa ni binadamu kama binadamu wengine wanahaki na wanastahili kila heshima” alikemea DC Gowele, huku akitoa msisitiza kuwa Watoto wanatakiwa kupata haki yao ya elimu.

Mbali na hayo, DC ambaye ni Mwenyekiti wa Ulinzi na Usalama wa alikemea tabia ya baadhi ya Watoto kutoa lugha za Matusi mbele ya Watoto “mzazi unapotoa lugha ya matusi mbele ya mtoto si jambo zuri”

Siku ya ‘Mtoto wa Afrika’ huadhimishwa kila mwaka juni 16, ikiwa ni utekelezaji wa nchi huru za Afrika, yenye dhamira ya kuwakumbuka Watoto wa Kitongoji cha SOWETO-nchini Afrika kusini  walioawawa kikatili wakati wa Utawala wa Makabulu.