DC GOWELE ATAKA MADAI YA WAZABUNI NA MAFUNDI YALIPWE KWA WAKATI

Posted on: January 16th, 2024

Mkuu wa Wilaya ya Rufiji Meja Edward Gowele amewataka Watumishi wa Serikali katika Halmashauri ya Wilaya ya Rufiji, kuhakikisha mafaili yanayohusu malipo ya Wafanyabiashara na na Mafundi wanaofanyakazi na Halmashauri yanafanyiwa kazi kwa Wakati ili kuepusha malalamiko kwa Serikali.

Amesema Wafanyabiashara, maisha yao hayategemei mishahara hivyo kuchelewa kwa malipo yanaweza kusababisha kuua biashara zao.

“inawezekana wewe  kuchelewesha nyaraka ndo umesababisha yeye akose haki yake. Unakaa na nyaraka wiki mbili, nne, tano ndo maana yeye anailaumu serikali!. Hakikisheni document  zinapita kwa haraka ili hawa Watu wapate haki zao. Sitaki nisikie Wafanyabiashara Wanalalamika” amesema.

DC Gowele ameyazungumza hayo jana Janauri 16, 2024 baada ya kusikiliza changamoto za Wazabuni na Mafundi katika Mkutano uliofanyika kwenye ukumbi wa Halmashauri ya Wilaya ya Rufiji- Utete.

Kauli hiyo ya Mwenyekiti wa Ulinzi na usalama wa Wilaya, imekuja baada ya malalamiko yaliyotolewa na baadhi ya Wazabuni akiwemo Andrew Kishumba, Mzabuni wa Wiland Company Ltd  ambaye amedai anaidai Halmashauri Shilingi milioni 48 baada ya kusambaza vifaa vya ujenzi katika Shule maalumu ya Mkoa ya  Wasichana Bibi Titi.

Akikiri deni hilo Mkuu wa Kitengo cha Manunuzi katika Halmashauri ya Wilaya ya Rufiji Amina Yassin amesema deni hilo lipo kwenye utaratibu wa malipo, na malipo yeke ndani ya wiki mbili yatakuwa yamekamilka.

Mbali na hayo, alipopewa nafasi ya kuzungumza chochote Mkuu wa Taasisi ya Kuzuia na Kupambana na Rushwa TAKUKURU, Wilaya ya Rufiji Lawrence Mlaponi amewakumbusha Wazabuni na Mfundi kuepuka kujihusisha na maswala ya rushwa.

Kwaupande wake Mwenyekiti wa Halmashauri ya Wilaya ya Rufiji Abdul Chobo amempongeza Mkuu wa Wilaya ya Rufiji kwa kuandaa mkutano huo ambao umetoa majibu ya kero zilizokuwa zinawakabili Wazabuni pamoja na Mafundi.