DC Gowele Apokea Saruji 100 za Ukarabati wa Madarasa, Nyumba ya Mwalimu

Posted on: December 9th, 2023

Mkuu wa Wilaya ya Rufiji Meja Edward Gowele, amepokea na kukabidhi mifuko 100 ya saruji kutoka Chama cha Ushirika cha Mkoa wa Pwani CORECU, kwa ajili ya ukarabati wa madarasa mawili na nyumba ya Mwalimu katika Shule ya Sekondari Muhoro, ikiwa ni arambee aliyoianzisha Novemba 5 mwaka huu.

Wadau wengine waliounga mkono ni banki ya CRDB mifuko 25, NMB mifuko 15 pamoja na Wananchi walioahidi kuchangia jambo hilo. CORECU, CRDB na NMB ni moja ya wadau walioahidi kuchangia mifuko ya saruji.

“Nawashukuru wadau wote ambao mmejitoa kuchangia jambo hili, leo nimepokea na nimekabidhi kwenu mifuko hii (saruji) ili ikiwezekana vianze kazi. Pia niwashukuru Wazazi ambao mlikubaliana wenyewe kwamba kila Mtoto mtachanga shilingi 1000, mmeonesha dhamira ya kuchangia miundombinu ya shule hii” amesema DC Gowele.

Makabidhiano hayo yamefanyika Disemba 8, 2023 katika shule ya Sekondari Muhoro huku akiwataka Wananchi na kamati iliyokabidhiwa mifuko hiyo kuhakikisha inatumika kama ilivyokusudiwa.

“ikitokea mmoja wetu akahujumu maana yake tutakuwa tunawadhulumu hawa Watoto, matarajio yao ni makubwa kuhakikisha miundombinu yao inakamilika na Walimu wao wanakaa katika mazingira salama. Mimi nitasimamia hii arambee mpaka mwisho” amekemea.

Kwa upande wake Mwenyekiti wa Chama cha CORECU Mussa Mng’aresa amesema kama chama wameguswa baada ya kupata taarifa, ndio maana wakaamua kutoa mchango.

“Mheshimiwa nilikuahidi nitaleta mifuko 100, hii ni mifuko ya Chama Kikuu CURECU”amesema Mng’aresa.

Mwenyekiti wa Halmashauri ya Wilaya ya Rufiji ambaye pia ni Diwani wa Kata ya Muhoro, Abdul Chobo amewashukuru wote waliotoa michangao yao, huku akitoa wito kwa wadau wengine kujitokeza kuchangia katika jambo hilo.

Akizungumza Mkuu wa Shule ya Sekondari Muhoro, amesema Disemba 5 2023 waliamua kuanzisha arambee baada ya kuona uchakavu wa madarasa mawili na nyumba 1 ya mwalimu.

Vilevile DC Gowele ameendelea kuwataka Wananchi kutunza miradi inayotekelezwa na serikali katika maeneo yao.