DC GOWELE AIPONGEZA HALMASHAURI KWA KUWATETEA WATOTO WANAOISHI KATIKA MAZINGIRA HATARISHI

Posted on: January 27th, 2023

Mkuu wa Wilaya ya Rufiji Meja Edward Gowele ametoa pongezi kwa Halmashauri ya Wilaya ya Rufijij kwa kuwatambua watoto wa kike wanaoishi kwenye mazingira hatarishi. na kuwatengea bajeti kupitia idara ya Elimu kwa ruzuku toka serikali kuu. 

Meja Gowele ameyasema hayo wakati wa kufunga warsha ya siku mbili ya kuwajengea umahiri walimu wa Shule za Sekondari .Januari 27. 2023 ambapo katika tukio hilo alikabidhi taulo za watoto wa kike 258 wa shule za sekondari wanaoishi kwenye mazingira hatarishi.

" nitoe pongezi za dhati kwa Halmashauri kuendelea kufanya jitihada ya kuibua na kusaidia watoto wenye mahitaji na kuwatengea bajeti ili kuweza kuwatetea na ugumu wa maisha unaopelekea watoto wengi wa kike kushindwa kufikia malengo yao." alisema Gowele

Sambamba na  hayo Meja Gowele ametoa pongezi kwa Walimu kwa namna wanavyojitoa kuhakikisha watoto wanapata malezi na elimu bora.

Ameongeza kwa kumtaka Mkurugenzi Mtendaji kutenga bajeti na kuona namna ya kuboresha mchakato wa uandaaji wa mitihani ya ndani kuanzia kwenye utungaji hadi usahihishaji ili kuwawezesha walimu kupata matokeo ya ndani yatakoonesha uhalisia kwenye matokeo ya mitihani ya Taifa.

Akitoa taarifa fupi kwa Niaba ya Afisa Elimu Sekondari, Afisa Maendeleo ya Jamii Mwanahamisi Lyana amesema kutokana na uwepo wa idadi kubwa ya Watoto wa kike wanaotoka katika mazingira hatarishi Halmashauri ya Wilaya ya Rufiji iliona haja ya kutenga bajeti kupitia ruzuku ya Serikali kuu ili kuwawezesha watoto hao.

Ameongeza kuwa taulo hizo za kike zitasaidia watoto wa kike kuwa na hedhi salama na kupunguza utoro uliokuwa unasababishwa na kukosekana kwa vifaa hivyo kwa watoto hao.