Bodi ya Afya Yazinduliwa Rufiji.

Posted on: November 3rd, 2023

Katibu Tawala (DAS) Wilaya ya Rufiji Mkoani Pwani Ayubu Sebabili, ameitaka Bodi ya Afya kuwa chachu ya Maboresho ya Miundombinu na huduma za Afya kwa Wananchi kwani wao ndio kiunganishi cha Wananchi na Serikali katika sekta ya Afya.

DAS Sebabili ameyasema hayo leo Novemba 2, 2023 wakati wa hafla fupi ya uzinduzi wa Bodi ya Afya Wilaya ya Rufiji iliyofanyika katika ukumbi mdogo wa ofisi ya Mkurugenzi Mtendaji.

“ Mtoe mawazo yenu katika mapitio ya bajeti za Afya kutokana na mahitaji halisi mnayoyasikia na kuyaona kwa Wananchi. Mkashauri namna bora ya kuboresha mapato yatakayowezesha kuimarisha utoaji wa huduma bora kwa jamii.” Alisisitiza Katibu tawala.

Sanjari na hayo ameitaka bodi hiyo kuwa sehemu ya mshikamano kwa Watumishi na kuacha kuwa chanzo cha maneno ya uchochezi yatakayoondoa ari ya kazi na ufanisi kwa watumishi.

Kwa upande wake Mwenyekiti wa Halmashauri ya Wilaya ya Rufiji Abdul Chobo ameipongeza bodi hiyo kwa kuaminiwa na kuchaguliwa huku akiweka bayana kuwa Halmashauri ipo tayari Kushiriki na kusimamia yale ambayo bodi hiyo itapendekeza na kuyaleta Halmashauri kwa manufaa ya Jamii .

“ tunategemea uwepo wenu mtatusaidia kuwajengea wananchi uelewa juu ya jitihada na huduma zinazotolewa na Serikali kwa Wananchi wake kwani Afya ndio msingi wa maendeleo ya jamii yoyote ile.” Alisisitiza Mwenyekiti.

Naye Kaimu Mkurugenzi Mtendaji Sebastian Gaganija amemtaka Mganga Mkuu Wilaya ya Rufiji kuhakikisha bodi hiyo inajengewa uwezo ili iweze kutekeleza majukumu yake kwa ufanisi na ubunifu Mkubwa.