60 teachers trained on students performance improvement

Posted on: June 3rd, 2018

Jumla ya walimu 60 wa masomo ya Fizikia, Kemia, Elimu ya Viumbe, Hisabati na Kiingereza wapatiwa mafunzo ya namna ya kufundisha masomo hayo kwa ufasaha. Mafunzo hayo yamefanyika katika ukumbi wa shule ya Msingi Ikwiriri kwa muda wa siku 2 mfululizo kuanzia jana.

Akiongea wakati wa ufunguzi; Afisa Elimu Sekondari wa Halmashauri ya Wilaya ya Rufiji Bw: Mussa A. Lambwe aliwaasa washiriki wote kuwa makini na kufuatilia mada mbalimbali zitakazowasilishwa na wawezeshaji wa kitaifa waliofika kutoa mafunzo hayo. Alisistiza kuwa semina ina lango la kuwajengea uwezo walimu wa masomo ya sayansi na lugha ya kiingereza. Kila mshiriki alikumbushwa kuwa ana jukumu la kwenda kuwafundisha walimu wengine katika kituo chake cha kazi yale yaliyofundishwa katika semina hiyo. 

Washiriki wa mafunzo hayo walikumbushwa na kufundishwa mada mbalimbali ikiwa ni pamoja na jinsi ya kutumia njia shirikishi, kulitawala darasa, kuandaa mpango kazi wa somo, kuepuka kutumia adhabu ya kuchapa fimbo kwa lengo la kujenga nidhamu ya wanafunzi, kuwatambua wanafunzi kwa uwezo wao kimasomo, kutumia malighafi za kienyeji zinazoweza kupatikana bure au kwa bei nafuu katika kuandaa masomo kwa njia ya vitendo.

Hata hivyo walimu walitoa baadhi ya changamoto wanazokumbana nazo katika kutekeleza majukumu ya kila siku. Muda ni mfupi pale mwalimu anapoamua kutumia njia shirikishi katika kufundisha. Njia shirikishi inachukua muda zaidi ukilinganisha na njia ya kawaida ya kufundisha ambapo mwalimu huwasilisha kile alichokiandaa kwa mujibu wa ratiba na mpango kazi wa somo lake kwa wanafunzi.

Kutokutumia adhabu ya kuchapa fimbo kurekebisha nidhamu ya wanafunzi nayo inaonekana ni changamoto kwani walimu wengi huona kama ni njia rahisi ya kumrudi mwanafunzi na huchukua muda mfupi ukilinganisha na njia nyingine.

Vilevile kumekuwa na ongezeko kubwa la wanafunzi wanaojiunga na elimu ya sekondari ukilinganisha na hapo awali. Darasa moja linakuwa na idadi kubwa ya wanafunzi ukilinganisha na uhalisia wake hivyo kupelekea mwalimu kumfikia kila mwanafunzi kipindi cha masomo ya darasani.

Mkufunzi wa mafunzo hayo Bw: Ramadhani Matimbwa aliwaasa walimu kutumia njia mbadala kujenga nidhamu ya wanafunzi badala ya fimbo. Alisema kuwa fimbo ina madhara makubwa sana kwa mwanafunzi ukilinganisha na faida zake; mojawapo ikiwa ni pamoja na kutengeneza chuki baina ya mwanafunzi na mwalimu, nidhamu ya woga,  maumivu makali ya mwili na kusababisha baadhi ya wanafunzi kukatisha masomo. 

Matokeo ya mafunzo hayo ni pamoja na kujenga nidhamu bora ya wanafunzi bila kutumia fimbo, kutumia njia shirikishi katika kufundisha hivy kuongezeka kwa ufaulu wa wanafunzi katika mitihani ya ngazi tofauti ikiwemo ya kitaifa.