KILA KIJIJI CHA UVUNAJI KIPANDE MITI 500 KILA MWAKA-DC GOWELE

Posted on: July 1st, 2024

Mkuu wa Wilaya ya Rufiji Mhe. Meja Edward Gowele ameaagiza Wenyeviti wa Vijiji na Watendaji wa Vijiji kuhakikisha wanasimamia kila Kijiji cha uvunaji wa misitu inapandwa miti 500 katika maeneo yao ili kuendelea kutunza mazingira.

Gowele alitoa maagizo hayo katika kikao kazi cha uvunaji wa misitu (TFS) kwa mwaka 2024/2025 kilichofanyika katika ukumbi wa Chuo cha Maendeleo ya Wananchi FDC-Ikwiriri Jumapili Juni 30, 2024, baada ya kuona uvunaji wa miti misituni kuwa mkubwa kuliko miti inayopandwa.

“Kila Kijiji kisipungue miti 500, nendeni mkasimamie upandaji wa miti na nipate taarifa kila aliyejisajili hapa nipate taarifa yake (wafanyabiashara ya uvunaji miti), kwanza makakati wake wa kupanda miti, ili kufukia malengo ya miti 1,500,000. Kila mmoja apewe jukumu la kupanda miti” alisisitiza DC Gowele huku aliendelea kusisistiza kujua muendelezo wa miti inayopandwa katika Kijiji husika.

Katika hatua hiyohiyo DC aliwataka Wenyeviti wa Vijiji na Watendaji wa Vijiji kuhakikisha wanawatambua watu wanaosafisha

“kila Mwenye kiti wa Kijiji na Mtendaji wa Kijiji tambua mashamba yanaenda kusafishwa katika eneo eneo lako, yapatiwe vibali kwa mujibu wa taratibu vya kufyeka miti, kuna miti mengine ipo kwenye mashamba lakini haitakiwi kukatwa, lazima TFS wajiridhishe miti yote inakatwa au mengine inabaki” aliongeza Gowele.

Kwa upande wake Mhifadhi wa Misitu Wilaya ya Rufiji Francis Kiondo aliendelea kuweka mkazo suala la upandaji wa miti katika kila kijiji kinachovunwa misitu ili kuendelea kutunza mazingira kwa kuotesha uoto wa asili, huku akiwataka Wenyeviti wa Vijiji, Vitongoji pamoja na Watendaji katika maeneo hayo kuanza kupanda miti pindi mvua za vuli zinapoanza.