WAZIRI MCHENGERWA ABORESHA NYUMBA ZA WAATHIRIKA WA MOTO KUEZEKWA KWA BATI

Posted on: September 4th, 2021

Waziri wa Nchi Ofisi ya Rais Menejimenti ya Utumishi wa Umma na Utawala Bora, ambaye pia ni Mbunge wa Jimbo la Rufiji Mhe. Mohamed Omary Mchengerwa ametembelea Waathirika wa Moto kitongoji cha shauri Moyo kata ya Mbwara Wilayani Rufiji na kutoa msaada wa bati 800 ambapo bati 600 zitatumika kuezeka nyumba 19 za Waathirika wa eneo hilo na nyingine kwenda kwenye maeneo mengine yaliyoathiriwa na Moto Wilayani humo.

Akizungumza wakati wa kukabidhi bati hizo Mhe. Mchengerwa amesema ameamua kubadilisha nyumba hizo ambapo awali zilikuwa za nyasi ili kuboresha makazi ya Waathirika hao na kupunguza kiwango Cha hatari ya nyumba kushika Moto kwa urahisi.

"Leo pamoja na Mambo mengine nimekuja kutoa sadaka ya bati kwa familia zote ambazo zimeathirika, Kama Mhe. Diwani anavyosema nyumba nyingi zimeathirika kutokana na Kuezekwa kwa  nyasi, tumeanua kubadilisha kutoka kwenye nyasi kwenda kwenye bati pengine zinaweza kusaidia kupunguza athari za moto usiathiri Sana." Alisema.
Aidha amewataka Wananchi kuzingatia ufanyaji wa Usafi kwenye maeneo ili kupunguza athari za moto kuwa kubwa zaidi." Tunaendelea kukumbushana kwamba ni vyema tukaendelea kufanya Usafi kwenye maeneo yetu ili kupunguza athari za moto." Alisema. 

Katika hatua hiyohiyo Mhe. Mchengerwa amekabidhi msaada toka kwa kampuni na Mdau wa maendeleo Rufiji ambapo ametoa Chakula ( Mchele na Unga), Mafuta ya kupikia, magodoro, pamoja na sukari kwa Waathirika wote wa janga la Moto.Mhe. Mchengerwa amewashukuru wadau hao na kuwakaribisha wadau wengine watakaoguswa na tukio hilo kuendelea kutoa msaada kwa Waathirika hao.
Kwa upande wake Diwani wa Kata ambaye pia ni Mwenyekiti wa Halmashauri ya Wilaya ya Rufiji Mhe. Juma Ligomba ametoa shukrani kwa Mhe. Mchengerwa kwa kuboresha makazi ya Wananchi wake toka kwenye nyumba za nyasi na kuezekwa kwa bati.

 Zainab Kapilima pamoja na Abdalla Msango wametoa shukrani zao kwa Serikali kwa kuwajali.