WAZIRI BASHUNGWA AKAGUA BARABARA YA UTETE-NYAMWAGE

Posted on: October 24th, 2024

Waziri wa Ujenzi Mhe. Innocent Bashungwa ametembelea na kukagua miradi mbalimbali ya maendeleo inayojengwa Wilayani Rufiji ukiwemo ujenzi wa barabara ya Utete-Nyamwage yenye urefu wa km 33.7 inayojengwa kwa kiwango cha lami.

Akizungumza baada ya kuangalia maendeleo ya barabara hiyo Mhe. Bashungwa, aliwataka Wakandarasi kufanya kazi kwa ufanisi ili kukamilisha kwa wakati  ujenzi wa barabara hiyo ambayo itaunganisha mawasiliano ya Utete kuelekea Nyamwage pamoja na kukuza uchumi wa Wananchi.

"Rais Samia Suluhu Hassani anataka kuifungua Barbara hii na ameleta fedha nyingi, Ili barabara hii isadie kuinua uchumi wa Wananchi" alisema Bashungwa.

Mradi mwingine alioutembelea leo Oktoba 24, 2024 ni pamoja na ukarabati wa hospitali ya Wilaya ya Utete na kuweka jiwe la msingi katika Shule ya Sekondari Rufiji iliyopo Kata ya Ikwiriri, ikiwa ni muendelezo wa ziara yake ya kukagua miradi mbalimbali ya maendeleo katika Mkoa wa Pwani.

Amesema Rais Samia Suluhu Hassani analeta fedha nyingi kwa ajili ya ujenzi wa miradi ya maendeleo katika Wilaya ya Rufiji huku akitoa wito kwa Wananchi wa Rufiji kushirikiana na Serikali katika ujenzi wa miradi mbalimbali ya maendeleo.

"kwakweli Rufiji inabadilika na Kuna miradi mingi ya maendeleo inatekelezwa, niwaombe Wananchi tuwaunge mkono Viongozi" alisisitiza Bashungwa.

Kwa upande wake Mkuu wa Mkoa wa Pwani Mhe. Abubakar Kunenge amemshukuru Rais Samia Suluhu Hassani kwa kuleta fedha nyingi katika Mkoa wa Pwani kwa ajili ya ujenzi wa miradi mbalimbali ya maendeleo kwa Wananchi.