WATENDAJI KATA NA MAAFISA UVUVI WAKABIDHIWA PIKIPIKI KUBORESHA UTOAJI HUDUMA KWA WANANCHI

Posted on: January 26th, 2022

I.Na Emmanuel Kapandila - Rufiji

Mbunge wa Jimbo la Rufiji ambaye pia ni Waziri wa Utamaduni Sanaa na Michezo Mohamed Mchengerwa amekabadhi pikipiki 22 kwa watendaji wa kata 13 za Wilaya ya Rufiji, Afisa Mtendaji wa Mamlaka ya Mji Mdogo pamoja na maafisa uvuvi  ili kusogeza huduma bora kwa Wananchi Wilayani humo.

Akizungumza wakati wa kukabidhi pikipiki hizo Mhe. Mchengerwa amesema ugawaji wa pikipiki hizo, unatekeleza agizo la Rais wa Jamhuri ya Muungano wa Tanzania kuhakikisha serikali inatoa huduma bora kwa Wananchi.

" hii ni sehemu ya kuwezesha huduma bora kwa wananchi. kwahiyo tunawataka watendaji kwenda kutoa huduma bora kwa wananchi.hatutegemei kusikia mwananchi ana kero ya kawaida mtendaji ameshindwa kwenda kumsikiliza." alisema 

Mchengerwa.

Awali akisoma taarifa fupi Mkurugenzi Mtendaji wa Halmashauri John Lipesi Kayombo amesema, katika kuboresha huduma kwa jamii kwa mwaka afedha 2021/2022 Halmashauri ya Wilaya ya Rufiji ilitenga jumla ya fedha shilingi milioni 63 kwa ajili ya ununuzi wa pikipiki 22 zikiwemo pikipiki mbili za miguu mitatu kwaajili ya usafi wa mazingira.

Kayombo ameongeza kuwa, Mkakati wa Halmashauri ni kuendelea kuboresha huduma kwa wananchi kwa kuhakikisha watendaji wa Kata na Vijiji wanawafikia wananchi kwa wakati.

Kwa upande wake Mkuu wa Wilaya ya Rufiji Meja Edward Gowele amesema Uongozi wa Wilaya ya Rufiji utaendelea kufuatilia na kutekeleza malengo ya Rais Mhe. samia suluhu hassan  katika kuhakikisha wananchi wake wanapatiwa huduma bora.

Naye Mwenyekiti wa Halmashauri Juma Ligomba amesema Halmsahauri haitomvumilia mtendaji atakayeweka maslahi binafsi kwa vyombo hivyo badala ya kutumia katika kutoa huduma kwa wananchi.

Lamudi Ngaruburwa Afisa Mtendaji Mkuu wa Mamlaka ya Mji Mdogo ameishukuru Halmashauri kwa kuboresha na kurahhisisha utendaji kazi na kuahudi kuongeza kasi ya utoaji wa huduma bora kwa wananchi.