WATAALAM WA TEHAMA PWANI WATATUA CHANGAMOTO ZA MIFUMO RUFIJI

Posted on: January 21st, 2021

Wataalam wa TEHAMA Mkoa wa Pwani wameshiriki kutatua changamoto mbali mbali za mifumo ya TEHAMA Wilayani Rufiji hususani katika maeneo ya Fedha, Utumishi na hospitali na kutoa elimu mbalimbali kwa watumiaji wa mifumo hiyo ili kuwawezesha kukabiliana na changamoto ndogondogo zinazowakabili kabla ya kumuita mtaalamu wa TEHAMA.

Zoezi hilo limefanyika ikiwa ni katika kukamilisha malengo ya kikao kazi cha siku tano kuanzia tarehe 18 - 21/1/2021 kilichojumuisha wataalamu toka Halmashauri zote Mkoa wa Pwani kujadili utekelezaji wa majukumu ya Kitengo katika Halmashauri, hali ya rasilimali watu na vifaa katika kitengo, ushiriki wa wataalamu katika vikao,mafunzo, mikutano, na makongamano ya kitaifa yanayohusiana na TEHAMA, hali ya matumizi ya mifumo mbalimbali hususani FFARS na GoTHoMIS, Mikakati ya uboreshaji wa utoaji huduma za TEHAMA katika Mkoa na mamlaka za serikali za mitaa, na namna ya uandaaji wa bajeti katika ya kitengo cha TEHAMA katika halmashauri

Awali wataalam hao walijadili changamoto zinazowakabili ikiwemo kutokuwa na ofisi maalum ya kitengo, samani za ofisi, vitendea kazi, uhaba wa fedha, uelewa mdogo wa walimu wanaotumia mifumo ya FFARS kuwaachia watu wengine wasiohusika kuwafanyia malipo katika mifumo, kuchanganya kwa taarifa katika mashine za malipo ( POS ) na kutokuwepo kwa usafiri maalum wa kitengo utakaowawezesha kufikia maeneo yenye changamoto kwa haraka hasa maeneo ya mbali.

Kufuatia changamoto hizo kikao kazi hicho kimepitisha maazimio kuwa vitengo viendelee kutenga bajeti zake kwa kuzingatia mambo ya msingi yatakayoviwezesha kutekeleza majukumu yake kwa ufanisi, Vitengo kufanya vikao vya tathmini ya utekelezaji kila mwezi, kufanya ufuatiliaji na ukaguzi wa mara kwa mara wa mashine za ukusanyanyi wa mapato ya halmashauri, na Vitengo kutoa msisitizo kwa kila shule kufanya kazi za mfumo wa malipo wenyewe badala ya kuwaachia watu wa mtaani kwa visingizio vya kukosa vifaa.