WANASHERIA WATOA ELIMU RUFIJI

Posted on: February 1st, 2024

Wananchi wa Kata ya Chumbi Wilayani Rufiji Mkoani Pwani wamepata semina ya namna ya umiliki wa ardhi, vyombo vya usimamizi wa ardhi, pamoja na vyombo vya utatuzi wa migogoro ya ardhi, hali itakayopelekea kupunguza migogoro katika maeneo yao.

Semina hiyo imefanyika leo Februari 1, 2024 katika kijiji cha Chumbi C, kata ya Chumbi kwenye ukumbi wa Kijiji hicho, yenye lengo la kuangalia haki ya Mwanamke katika umiliki wa ardhi, ikiwa ni kampeni ya Linda Adrhi ya Mwanamke ‘Stand For Her Land’, iliyoandaliwa na mashirika mbalimbali ikiwemo Jukwaa la Ardhi Tanzania, Shirika la kutetea haki za binadamu LHRC, Shirika linalofanya kazi na serikali na mashirika ya ndani kupata haki za sheria za ardhi kwa familia masikini LANDESA, Shirika la sheria kiganjani na Chama cha Wanasheria Wanawake Tanzania.

Wananchi wa Chumbi walitumia fursa hiyo kueleza matatizo yao ya migogoro ya ardhi na kuomba msaada wa kisheria na kusaidiwa njia zipi wapite ili kupata haki zao, ambapo Pili Mnema Mkazi wa Kijiji cha Chumbi C alidai Baraza la ardhi la Kata lilitoa maamuzi ya kumshindisha kesi Mwananchi huyo alipokuwa kwenye kesi ya Mgogoro wa ardhi.

Akitoa ufafanuzi juu ya maamuzi yaliyofanywa na Bazaraza hilo, Mwanasheria Nuru Pipino amesema hukumu hiyo ni batili kwasababu Baraza la Kata halina uwezo wa kutoa maamuzi ila lina mamlaka ya kufanya usuluishi na kutoa hati ya mgogoro kama umeshindikana kusuluishwa, ili kesi iendelee ngazi nyingine.

 “na baada ya hapo kupitia ile hati utaenda baraza la nyumba ya ardhi ya Wilaya kufungua kesi upya” amefafanua.

Baada ya mafunzo hayo katika mahojiano binafsi na baadhi Wananchi wamewapongeza walioandaa semina hiyo ambayo imetoa elimu kwa Wananchi juu ya masuala ya kisheria.

Kwa upande wake Wakili kutoka Shirika na utetezi wa haki za binadamu LHRC, Aneth Kaganda amewasisitiza Wanawake kujitokeza kwa wingi kugombea nafasi mbalimbali za uongozi na kufanya maamuzi ya maendeleo katika maeneo wanayoishi.

Kampeni hiyoimefanyika katika kata 3, Utete, Chemchem na Chumbi.