WANANCHI WATAKIWA KUTUNZA MATUMBAWE

Posted on: February 23rd, 2024

Serikali Wilayani Rufiji Mkoani Pwani imewataka Wananchi hususani wanaojishughulisha na Uvuvi pamoja na mazao ya bahari kuacha kuharibu miamba ya makuzi ya vizalia vya viumbe hai Wanaoishi baharini (Matumbawe) ili kutunza uhai wa viumbe hivyo.

Hayo yamesemwa na Mkuu wa Wilaya ya Rufiji Meja Edward Gowele wakati akifungua mafunzo ya namna ya uhifadhi wa miamba ya makuzi ya vizalia vya viumbe hai wanaoishi baharini yaliyofanyika katika ukumbi wa Halmashauri Februari 23, 2024.

“niombe Wadau mlioshiriki hapa leo ndo maana tumejumuisha na Wavuvi, tusipotunza maana yake kesho hatutauza na hatutazalisha kwa sababu sisi tunajua nani anavua kwa kutumia uvuvi haramu mfano wa baruti, kwahiyo tukawe wakali vinginevyo tutapoteza hizi spicies (viumbe hai) katika maeneo yetu” Alisisitiza Meja Gowele

Akielezea faida ya miamba hiyo baharini Meneja wa Taasisi ya hifadhi ya bahari na maeneo tengefu Godfrey Ngupula amesema miamba hiyo ndio uhai wa viumbe hai wanaoishi baharini na kufafanua kuwa kutokuwepo kwa miamba hiyo itasababisha viumbe hao kukosa makazi maalumu ya kuzaliana na kutunza viumbe baharini ambapo moja ya jambo linaloweza kusababisha kuvunjika kwa miamba hiyo ni ukataji holela wa miti ya mikoko pembezoni mwa bahari.

 “matumbawe ni eneo dogo sana halizidi hata asilimia moja ya bahari yote, zaidi ya asilimia 80 ya Wavuvi wa kawaida wanategemea uhai wa matumbawe, kwahiyo Matumbawe ni miamba iliyopo baharini. Sasa kwenye ufukwe huku kua Matumbawe mengi sana ni zaidi ya upana wa km 1 mpaka 3 lakini pia ni marefu kuanzia Mtwara, Kilwa, Mafia, Kibiti, Rufiji (Mohoro), Tanga na Pemba. Sasa rasilimali hii lazima itunzwe” amesisitiza Ngupula.

Kwa upande wake, Mwenyekiti wa Halmashauri ya Wilaya ya Rufiji na Diwani wa kata ya Mohoro Abdul Chobo ameipongeza Taasisi hiyo kwa kutoa semina ya elimu juu ya umuhimu wa kutunza Matumbawe kwasababu Mohoro inapakana na Kibiti ambayo eneo nusu ya eneo lake lipo katika Matumbawe.

Akielezea namna alivyoyapokea mafunzo hayo, Yusuph Pakacha Mvuvi na Mkazi wa Hohoro amesema aatkuwa balozi mzuri wa kutoa elimu kwa Wavuvi wengine kuacha tabia ya ukataji wa miti ya mikoko na uvuvi haramu ili kutunza rasilimali hizo.

“nilichojifunza hapa ni kwamba Matumbawe hayafai kuyang’oa, kuyakata kwasababu ni mazalia ya samaki pamoja na kuacha ukataji wa miti ya mikoko” amesema.