WAKULIMA WA PAMBA WALIOATHIRIKA NA MAJI, KUPEWA VIUATILIFU VINGINE.

Posted on: March 16th, 2024

Mkuu wa Wilaya ya Rufiji Meja Edward Gowele, ameipongeza bodi ya pamba TCB, kwa kuridhia kutoa viuatilifu (dawa ya kuulia wadudu)  kwa Wakulima wa Rufiji, ambao mashamba yao yameathirika na maji yaliyofunguliwa kwenye Mradi wa kufua umeme wa Julius Nyrerere JNHPP, hivi karibuni.

Amesema maamuzi ya bodi hiyo kutoa viuatilifu itawatoa hofu wakulima, ya kufikiria namna ya kuzirudisha kwakuwa walikopeshwa na bodi na walitakiwa kurejesha baada ya mavuno, huku akiwataka Maafisa ugani kuchukua takwimu za Wakulima wote waliathirika na maji hayo.

“Kwasababu tunajua vile viuatilifu wamekopeshwa, watatakiwa kurejesha watakapovuna lakini wapo ambao mashamba yao yameathirika, niwaombe maafisa ugani mtafute takwimu halisi ya wale Wakulima ambao wameathirika na ambao tayari wameshapewa viuatilivu na wameshaweka maeneo hayo (mashambani) na kwa bahati mbaya mashamba yao yameathirika ili wasipate ule mzigo wa kuja kulipa.

Lakini pia wapewe viuatilifu mbadala kama ambavyo bodi imeridhia, sisi tunawashukuru sana kwasababu kitu ambacho nilikuwa nafikiria ni namna gani wanaweza kurecover (kuilipa) ile cost (gharama)” Alipongeza Dc Gowele

Gowele ametoa pongezi hizo katika kikao cha tathmini ya utekelezaji wa kilimo cha pamba Wilayani Rufiji, kilichofanyika katika ukumbi wa Chuo cha Maendeleo ya Wananchi (FDC), Ikwiriri machi 16, 2024.

Aliongeza kuwa maji hayo yalifunguliwa kwasababu bwawa katika mradi wa Julius Nyerere limejaa wakati ujenzi unaendelea, hali iliyosababisha kuyafuungulia ili ujenzi uendelee.

“hii effect (athari) ni muda mfupi tu, tunatarajia tarehe 25/5/2024, hii hali haitaendelea tena, na baada ya hapo Wakulima watarudi kuendelea na kilimo chao na hatutapata mafuriko tena ” aliongeza

Kwa upande wake, Balozi wa pamba Tanzania Aggrey Mwanri amesema usajili wa kilimo hicho bado unaendelea kwa Mkulima yeyote atakayetaka kujiunga.

“Mwananchi yeyote atayejitokeza hata kama imetokea tumeoveregister (usajili umepitiliza), akaomba kupatiwa mbegu baada ya kusikia huo mpango, apewe” amesema Mwanri.