TUNATAKIWA KUSIMAMIA, KUENDELEZA NA KUILINDA MIRADI INAYOTEKELEZWA NA SERIKALI KWA MANUFAA YETU:

Posted on: February 9th, 2021

Mwenyekiti wa Halmashauri ya Wilaya Rufiji Juma Ligomba amewataka Wananchi kusimamia, kuendeleza na kulinda Miradi inayotekelezwa na serikali ili kuleta maendeleo kwa Vijiji na Halmashauri. Pia amesisitiza ukusanyaji wa mapato ya Kijiji pamoja na  Halmashauri ili kuweza kuinua uchumi na maendeleo kwa Kijiji na Halmashauri kwa Ujumla.

Ameyasema hayo alipokuwa katika Mkutano na Wananchi wa Kata ya Mwaseni uliofanyika katika kijiji cha Mloka mara baada ya kumaliza ziara ya ukaguzi wa miradi inayotekelezwa na Serikali kupitia Halmashauri ya Wilaya ya Rufiji na kusikiliza kero za Wananchi hao. “ Suala la ukuasanyaji wa mapato ni sawa na mchanga na jicho. Tusikubali kuacha kusimamia mapato na makusanyo kwa Kijiji na Halmashauri yetu kwa ujumla.” Alisema.

Sambamba na hilo amewataka Wananchi kushiriki kikamilifu katika ujenzi wa miradi ya serikali ili kuwezesha miradi hiyo kutekelezwa kwa wakati na kwa ufanisi mkubwa.

Pia amesisitiza juu ya utunzaji, uendelezaji na ulinzi wa miradi ya mabwawa ya samaki iliyodhaminiwa na watu wa TAWA ikiwa na lengo la kupunguza tatizo la Wananchi kwenda kufanya shughuli za uvuvi katika mabwawa yaliyomo ndani ya hifadhi. Mabwawa hayo mawili ya Mtanzamsona na Bwala la Mloka yamejengwa kwa thamani ya shilingi milioni 40 huku kila bwawa likiwa limejengwa kwa shilingi milioni 19 na fedga nyingine kumalizia uwekaji wa vifaranga na chakula. “ ninawasihi mshirikiane kwa pamoja kutunza, kuendeleza na kuyalinda mabwawa ya samaki kwani faida yake ni kubwa kwa kijiji na Mwananchi mmoja mmoja. Kama hatutaweka ulinzi katika mabwawa yale basi samaki wote waliopo kuna siku hawatakuwepo na tutakuwa tumefanya kazi bure.” Alisema.

Mheshimiwa ligomba ametembelea mradi wa ujenzi wa darasa Shule ya Sekondari Mwaseni, maendeleo ya ujenzi wa nyumba ya daktari na kituo kwa ujumla katika kituo cha afya mloka pamoja na maendeleo ya mabwawa ya samaki yaliyojengwa kwa ufadhili wa TAWA na kuwataka wananchi na kamati za usimamizi wa miradi hiyo kusimamia vizuri ili iweze kuleta tija kwa Wananchi. “ Natoa rai yangu kwa Wananchi na viongozi kusimamia vizuri miradi hii ili iweze kuleta manufaa  kwetu.” Alisema.