TUMUWEKE MUNGU MBELE NA TUBADILI TABIA ILI KUONDOKANA NA MAAMBUKIZI MAPYA YA VIRUSI VYA UKIMWI: DC SAWALA

Posted on: December 1st, 2020

Mkuu wa Wilaya ya Rufiji Luteni Kanali Patrick Sawala ameyasema hayo  leo ambapo ameongoza maelfu ya Wananchi wa Wilaya ya Rufiji katika zoezi la kupima na kutoa damu kwa hiari ikiwa ni  sehemu ya  Maadhimisho ya Siku ya Ukimwi Duniani ambayo kiwilaya yameadhimishwa katika kijiji cha Shela kata ya Mohoro Wilayani humo.

 Tukio hilo limehudhuriwa na Katibu tawala Wilaya Bi. Maria Katemana,Mwenyekiti Mteule wa Halmashauri Mhe. Juma Ligomba akiambatana na Makamo Mwenyekiti Mteule wa Halmashauri,  Mkurugenzi Mtendaji wa Halmashauri Ndg. Rashid Salum Salum, Kamati ya Usalama ya Wilaya, Watendaji mbalimbali ngazi ya Halmashauri , Kata na Vijiji pamoja na Maelfu ya Wananchi waliojitokeza katika tukio hilo.

Mhe. Sawala, amewataka Wananchi kuunga Mkono juhudi za Serikali katika kupambana na maambukizi mapya ya Virusi vya Ukimwi huku akiwataka Vijana kubadili tabia na kuzingatia maelekezo ya Wataalamu wa Afya kuchukua  tahadhari za maambukizi ya Ugojnjwa huo. “ Ninawasihi kujiepusha na maambukizi mapya, kuchukua tahadhari na kuacha Ngono zembe”, kwa upande wa Wananfunzi Sawala amewataka wananfunzi kusubiri na kuzingatia jukumu lao ambalo ni kusoma. “ Wanafunzi msubiri! Someni msiharakie maisha jukumu lenu ni kusoma.” Sambamba na hilo Mkuu wa Wilaya amewasisitiza wazazi kuacha kulazimisha ndoa za Utotoni kwa Watoto wao. Pia amehimiza Wananchi kupima ili kujua Afya zao mapema na Waanze tiba kwa wakati pindi wanapogundua kuwa wameathirika.

Aidha Mhe. Sawala amewataka wale wote wanaoambukiza wenzao kwa makusudi waache mara moja kwani kufanya hivyo ni kutenda dhambi ya kubwa ya kuua. “ Ukimrubuni mtu na kufanyanaye ngono bila kinga hali ya kuwa unafahamu kuwa umeathirika, unatenda dhambi ya kuua”. Alisema

Sambamba na hilo, Mkuu wa Wilaya amevipongeza vikundi vya sanaa vilivyotoa Burudani zilizobeba Ujumbe mzito wa Kuelimisha jamii dhidi ya maambukizi ya Virusi vya Ukimwi. Pia ameagiza kutunza na kuendeleza sanaa ya ushairi kwa kuhakikisha kila shule inakuwa na Wanafunzi wanaoweza kutunga kutunga mashairi. “ Navipongeza Vikundi vyote vya Sanaa vilivyotoa burudani hususani mzee Omary Mbonde pamoja na mzee Mwelekwa ninaagiza Wazee hawa wawe wanaalikwa katika Shughuli zote za Wilaya “.Alisema.

Akisoma Risala kwa Mgeni Rasmi, Afisa Maendeleo ya Jamii ameeleza mafanikio yaliopatikana kaika Wilaya ya Rufiji,” Mafanikio yaliyopatikana katika kupambana na janga la UKIMWI  ni kuviwezesha  vituo 28 kutoa huduma za VVU/UKIMWI ambavyo vituo 11 vinatoa dawa za kupunguza makali ya VVU (CTC) na 17 vinatoa huduma za kuzuia maambukizi ya VVU kutoka kwa mama kwenda kwa mtoto (PMTCT). 

Ili kuhakikisha huduma zinawafikia walengwa kirahisi kuna watoa huduma za majumbani (Home Based Care Providers) 41 katika Kata 13 za Wilaya ya Rufiji 

Vilevile tunawaelimishaji rika 23 waliopatiwa mafunzo kupitia shirika la THPS, mwaka 2018. Kati ya hao 15 wanaendelea kutoa huduma katika vituo vyetu 11 vinavyotoa huduma kwa wateja wanaoishi na VVU/UKIMWI. Tumefanikiwa kuwapatia bima ya Afya iliyoboreshwa zaidi ya Vijana  172 wanaoishi na maambukizi ya VVU katika Halmashaurin ya Wilaya ya Rufiji ikiwa ni mchango kutoka katika Ofisi ya Mkurugenzi Mtendaji na shirika la THPS ambao wamekuwa wadau wetu katika mapambano dhidi ya maambukizi ya VVU/UKIMWI kwa muda mrefu sasa. Alisema

Kwa upande wake Katibu Tawala Wilaya Bi. Maria katemana amewapongeza Wananchi kwa kujitokeza kwa Wingi katika maadhimisho hayo na kuwasihi kuzingatia jumbe zinazotolewa katika maadhimisho hayo.

Naye Mkurugenzi Mtendaji Wilaya Ndg, Rajshid Salum Salum amewataka Wananchi kuacha tabia za Unyanyapaa na kusisitiza kuwa Ukimwi upo hivyo tahadhari na kupima ni mambo muhimu ya kuzingatia” Ukimwi upo, tupime afya zetu, tusiwanyanyapae wenzetu tushikamane ili tuwe kitu kimoja.” Alisema.

Zaidi ya Wananchi 115 walijitokeza kupima na kuchangia damu ambapo kwa takwimu za madaktari na wataalmu wa afya waliokuwa wakiendesha zoezi hilo wamesema hakuna aliyekutwa na maambukizi ya Virusi vya Ukimwi. Wilaya ya Rufiji mpaka hivi sasa takwimu zinaonesha kuwamaambukizi mapya  ni asilimia 1.6 tu.