TUMIENI MBINU ZA KIBIASHARA KUHAKIKISHA MIRADI YA SERIKALI INAPATA VIFAA VYA UJENZI. TUIWEKE RUFIJI YETU MBELE: Patrick Sawala, Mkuu wa Wilaya ya Rufiji

Posted on: January 7th, 2021

Mkuu wa Wilaya ya Rufiji Luteni Kanali Patrick Sawala amewataka Wafanyabiashara wa Vifaa vya ujenzi Rufiji kutoa kipaumbele cha usambazaji wa vifaa katika miradi ya Serikali hasa katika Shule za Sekondari ambazo zimo katika kampeni ya ujenzi wa madarsa 13  yanayotarajiwa kupokea Wanafunzi awamu ya pili 650 wa Kidato cha kwanza 2021 kufikia tarehe 28/2/2021.Sawala ameyasema hayo alipokuwa katika kikao maalum cha Wafanyabiashara pamoja na Watendaji kata, lengo kuu likiwa ni kujadili hali ya utekelezaji wa miradi hiyo na changamoto zinazoweza kusababisha miradi hiyo kuchelewa kumalizika. “ tumieni mbinu za kibiashara kuhakikisha miradi ya serikali inapata vifaa vya ujenzi. Tuiweke Rufiji yetu mbele.”Alisema.Sambamba na hilo, amewataka watendaji na wasimamizi zikiwemo kamati za ujenzi wa madarsa hayo, kuagiza vifaa mapema ili vipatikane kwa wakati. “ Wasimamizi agizeni vifaa mapema ilivipatikane kwa wakati.” Alisema.AIdha amesisitiza kuwa shughuli zote za ujenzi ziende pamoja na utengenezaji wa viti na meza pamoja na madirisha ili kuendana na wakati na kuwa ifikapo tarehe 10/02/2021 zoezi hili liwe limekamilika. “ shughuli zote za ujenzi ziende pamoja. Ikifika tarehe 30 januari madawati na madirisha yawe tayari.” Alisema. Pia amewataka Watendaji kutoa taarifa ya maendeleo ya ujenzi ikiwa picha ya jengo au majengo kila inapokamilika hatua moja kwenda nyingine na kutoa taarifa kwa haraka pale inapotokea changamoto. Amewataka watendaji wa halmashauri wanaohusika na miradi hiyo kutoweka urasimu wa aina yoyote ilikuhakikisha miradi inatekelezeka kwa wakati uliopangwa. “ Sitarajii kumuona mhandisi ofisini amekaa tu, sitarajii kusikia urasimu wa aina yoyote. naomba tuchukulie ujenzi huu kama operesheni. Hatutakiwi kushindwa na hatuna sababu ya kushindwa.” Alisema.Awali, Wafanyabiashara hao pamoja na Watendaji waliitaja changamoto ya ukosekanaji wa sementi kwa wakati na kwa idadi ndogo kulinganisha na mahitaji kuwa ni changamoto kubwa inayoweza kurudisha nyuma juhudi za ukamilishaji wa miradi hiyo kwa wakati uliopangwa. Pia, Wafanyabiashara wametoa angalizo la upandaji wa bei kwa bidhaa nyingine kama vile nondo unaoweza kupelekea shida kwa wanunuzi hasa katika kipindi hiki cha ujenzi.