TAWA, FRANKFURT WAJENGA DARASA NA OFISI YA WALIMU SHULE YA SEKONDARI MWASENI

Posted on: December 1st, 2025

Mamlaka ya Usimamizi wa Wanyamapori Tanzania (TAWA) kwa kushirikiana na Shirika la Kimataifa la uhifadhi (Frankfurt Zoological Society) wamejenga Chumba kimoja Cha Darasa, ofisi ya Walimu pamoja na ununuzi wa viti na meza 45 Katika Shule ya Sekondari Mwaseni Kata ya Mwaseni Wilayani Rufiji ambapo Jumla imegharimu kiasi cha Shilingi milioni 60 ili kuendelea kuboresha Sekta ya elimu kwa ajili ya  Walimu na Wanafunzi.

Majengo hayo yamezinduliwa jana Disemba 1, 2025 na Mkuu wa Wilaya ya Rufiji Mhe. Luteni Kanali Fredrick Komba katika Shule ya Sekondari Mwaseni.

Akizungumza baada ya kukagua na kuzindua Darasa na Ofisi hiyo, Mkuu wa Wilaya ya Rufiji Mhe. Luteni Kanali Fredrick Komba aliwashukuru na kuwapongeza TAWA pamoja na Frankfurt kwa kuonesha jinsi uhifadhi unavyoleta tija katika jamii, hasa kwa kugusa Sekta ya elimu ambayo inahudumia Wanafunzi wengi wa Kata hiyo, huku akiwataka Wananchi kuendelea kutunza mapori ya akiba yaliyo katika maeneo wanayoishi kwa kuacha tabia ya ujangiri ili yaendelee kuleta faida katika jamii.

Kwa upande wake, Kamishina Msaidizi Mwandamizi wa Uhifadhi TAWA, Abraham Jullu, amesema TAWA imerudisha faida ya uhifadhi kwa jamii inayopakana na pori la akiba, ambapo kwa kata ya Mwaseni wameona ni vizuri kugusa Sekta ya elimu ambayo itatoa huduma kwa jamii na maeneo wanayoishi kwa kuacha tabia ya ujangiri ili yaendelee kuleta faida katika jamii.