SERIKALI YATOA 143,510,000 MIKOPO KWA VIJANA, WANAWAKE NA WENYE ULEMAVU

Posted on: October 22nd, 2020

Halmashauri ya Wilaya ya Rufiji imetoa jumla ya Shilingi milioni 143,510,000 ambayo ni asilimia kumi( 10%) ya mapato.

Akizungumza wakati wa kukabidhi fedha kwa Vikundi vya Vijana, Wanawake na wenye ulemavu, Kaimu Mkurugenzi Mtendaji wa Halmashauri ya Wilaya ya Rufiji Ndg. Geriad Mgoba amesema, tangu Serikali itoe maelekezo kwa Halmashauri kutoa asilimia kumi ya pato lake kwaajili ya Makundi hayo maalum, Halmashauri ya Wilaya ya Rufiji imekuwa ikitoa fedha hizo kwa asilimia miamoja.

Aidha Mgoba ametaja Changamoto ya baadhi ya Vikundi kushindwa kufanya marejesho kwa dhana  kuwa, fedha wanazopewa ni msaada tu na sio za kuwainua kiuchumi.

Naye Mkuu wa Wilaya ya Rufiji Mhe. Luteni Kanali Patrick Sawala amesisitiza juu ya urejeshaji wa mikopo ili waweze kukopa kwa Mara nyingine." Huu ni upendo wa pekee wa Serikali ya awamu ya tano kwa Wananchi wake. " Alisema.

Kwa upande wao wanufaika wa mikopo hiyo, wameishukuru Serikali ya awamu ya tano inayoongozwa na John Pombe Magufuli kwa kuwajali Wanyonge hasa katika kuwainua kiuchumi.