PESA ZINAZOKUSANYWA KWENYE VITUO VYA AFYA ZIPELEKWE BENKI-MGANGA MKUU

Posted on: July 25th, 2024

Mganga Mkuu wa Wilaya ya Rufiji Dkt. Hamis Abdallah, ametoa maelekezo kwa Waganga Wafawidhi kuhakikisha pesa zinazokusanywa kwenye vituo vyao zinapelekwa benki ili kuongeza mapato kwenye Serikali na kusaidia kutatua matatizo ya Wananchi ikiwemo ununuzi wa dawa, huku akiwataka kuweka mipango mizuri ya ukusanyaji wa mapato.

"mipango yetu ilenge kutatua matatizo ya Wananchi, mpaka kufikia Agost 1, pesa zote zilizokusanywa zipelekwe benki, muwe makini sana kwenye kufikia malengo ya bajeti tuliyojiwekea" amesema Dkt. Hamis.

Dkt. Hamis aliyazungumza hayo kwenye kikao kazi cha Mwaka (2023/2024) cha CHMT na Waganga Wafawidhi kilichofanyika katika ukumbi wa halmashauri ya Wilaya ya Rufiji leo Alhamis Julai 25, 2024, kilicholenga kuangalia tathimini ya utendaji kazi.

Mbali na hayo, aliwataka kutumia lugha nzuri kwa Wagonjwa pamoja na kufanya kazi kwa bidii na kwa kushirikiana ili kuendelea kutoa huduma bora kwa Wananchi.

Kwa upande wake, Kaimu Mkurugenzi Mtendaji wa Halmashauri ya Wilaya ya Rufiji Sebastian Gaganija, alitumia kikao hicho kuwasisitiza Watumishi wa Afya kuzungumza lugha nzuri pindi wanapowapokea na kuwahudumia Wagonjwa  pamoja na kufanya kazi kwa bidii katika utoaji huduma Kwa Wananchi.

"tuzungumze lugha nzuri kwa Wagonjwa tunaowapokea katika vituo vyetu na tuwahudumie vizuri" alisisiza Gaganija.

Kwa upande wake Mkaguzi wa ndani wa halmashauri ya Wilaya ya Rufiji Furaha Ngabo, amewataka Waganga Wafawidhi kufuata sheria, kanuni na taratibu  kwenye ukusanyaji wa mapato.