ONYO KALI KWA VIJIJI VISIVYO NA UTARATIBU WA KUVUSHA WATOTO KWENYE VIVUKO

Posted on: February 14th, 2022

Mkuu wa Wilaya ya Rufiji Meja Edward Gowele ameonya vikali swala la watoto wadogo kujivusha wenyewe kwa kutumia ngalawa na kuzitaka serikali za Vijiji zinazopuuzia utaratibu  wa kuvusha watoto kuweka utaratibu mara moja .
Meja Gowele ameyasema hayo februali 14. 2022 alipotembelea eneo la kivuko cha bwawa la Umwe  kitongoji cha makalafati Kijiji cha Umwe kusini ambapo iliripotiwa  kuwa watoto hao hujivusha wenyewe kwa kutumia ngalawa pindi wanapokwenda na kurudi shuleni.
“ ninawaagiza kuweka utaratibu wa kuvusha watoto. lazima tuhakikishe watoto wanavushwa asubuhi na muda wa kurudi kama utaratibu ulivyowekwa kwenye vivuko vingine ndani ya Wilaya.  viongozi tunaowajibu wa kuhakikisha usalama wa wananchi wetu hususani watoto. ” alisema Gowele
Aidha amebainisha kuwa pamoja na uwepo wa njia nyingine mbili ambazo sio za kuvuka kwa ngalawa bado kuna ulazima wa kuweka utaratibu katika kivuko hicho kwani ndicho wanachopendelea watoto kutokana na urahisi wake wa kufika shuleni.
Ameongeza  kuwa wilaya ya rufiji ni wilaya ambayo kwa jiografia yake imezungukwa na maji hivyo maeneno mengi watu huvuka kutoka sehemu moja kwenda nyingine kwa utaratibu uliowekwa na wananchi wenyewe kupitia serikali za vijiji na kumtaka mwenyekiti wa kijiji pamoja na mtendaji kuchukua hatua hizo ndani ya siku mbili.
Kwa upande wake Mwenyekiti wa Kijiji cha Umwe kusini Rajabu Issa Mnara ameeleza kuwa awali kulikuwa na utaratibu wa watoto hao kuvushwa na wazazi lakini katika kipindi hiki cha kilimo wazazi wamekuwa wakikiuka makubalino na kuwaacha watoto wanajivusha wenyewe. hata hivyo amesema atachukua hatua za haraka na kutekeleza maelekezo kama yalivyotolewa na mkuu wa wilaya . 
 “ wananchi ndio walioomba hivi vivuko toka serikalini na serikali ikatekeleza na wazazi ndio waliokuwa wakiwavusha watoto lakini kutokana na shughuli za kazi kumekuwa hakuna uhakika wa kuvusha watoto. Tutakaa na kumchagua mtu akayekuwa anavusha watoto kuanzia kesho.” Alisema Mwenyekiti wa Kijiji.