NISISIKIE KOROSHO ZINATOROSHWA: DC GOWELE

Posted on: October 11th, 2021

Mkuu wa Wilaya ya Rufiji Meja Edward Gowele amekemea vikali utoroshaji wa mazao hasa msimu huu wa zao la korosho na kuwataka Wakuu wa vyombo vya ulinzi na usalama Wilaya, Viongozi wa Vyama vya msingi pamoja na Wananchi wote kukomesha swala hilo.

Ameyasema hayo oktoba 11.2021 katika kikao cha Wadau wa zao la korosho kilichofanyika katika ukumbi wa Halmashauri, Utete Wilayani humo.Gowele amewataka viongozi pamoja na wananchi kuhakikisha wanashiriki kikamilifu kupitia utoaji wa taarifa za vitendo vyote viovu ili kuinua uchumi kwa Wananchi na Taifa kwa ujumla.

“ Tumuunge Mkono Rais wetu Mhe. Samia Suluhu Hassan hasa katika ukusanyaji wa mapato ili atuletee maendeleo kupitia mapato hayo. Mimi na vyombo vyangu tuko macho wakati wote, tunachohitaji ni taarifa tu “.  Alisema.

Aidha amekemea tabia ya Wananchi kutosafisha mashamba pamoja na uchomaji wa moto wakati wa usafishaji na kuzitaka mamlaka zinahohusika kuhakikisha sheria za nguvu kazi pamoja na mazingira zinatekelezwa ili kukomesha tabia hiyo. 

“ Nisisikie mtu anachoma moto kusafisha shamba lake”. Alisema.

Kwa upande wake Mwenyekiti wa Halmashauri Juma Ligomba amewataka viongozi wa vyama vya ushirika (AMCOS) kuhakikisha wakulima wanapata elimu ili kuzalisha mazao bora kwa misimu ijayo.

Akijibu hoja ya ukosefu wa usafiri kwa Wataalamu wa Kilimo Mkurugenzi Mtendaji wa Halmashauri ya Wilaya ya Rufiji John Lipesi Kayombo amesema, tayari Halmashauri imeshaanza mchakato wa kuagiza pikipiki za Zaidi ya kumi (10) ambazo zitatumika kwa kazi mbalimbali ikiwemo kwa Wataalamu hao.

Kwa upande wake Mwenyekiti wa mpito chama kikuu cha ushirka Mkoa wa Pwani ameomba usimamizi kuzuia utoroshaji wa korosho huku akisisitiza kuwa kuruhusu utoroshaji kunaathiri upatikanakaji wa pembejeo kwani hutolewa kutokana na wingi wa mazao yanayokusanywa katika amcos husika.