NATOA SIKU TATU KIFUSI MLICHOTELEKEZA BARABARANI KIWE KIMESAMBAZWA

Posted on: January 26th, 2021

Mkuu wa Wilaya Rufiji amemtaka Mkandarasi wa kampuni ya Globalink General Contrctors limited kuhakikisha anasambaza kifusi alichokitelekeza kwa muda mrefu katika barabara iliyopo Utete Wilayani Rufiji yenye umbali wa mita 400 toka barabara ya awali inayotoka  bomani.

Awali alimtaka mkandarasi huyo kueleza sababu za kutelekeza kifusi hicho katikati ya barabara bila kukisambaza na kusema kuwa changamoto za mvua zilikwamisha kazi hiyo kuendelea kufanyika na kuahidi kuwa ataanza usambazaji mara moja.

Pamoja na ahadi hiyo, Sawala amemtaka mkandarasi huyo kuwa na moyo wa kizalendo katika kutoa huduma hiyo na kuwa kufanyavizuri kazi hiyo ni kuwanufaisha Wanarufiji na Tanzania kwa ujumla. “kuwa na moyo wa kizalendo ukiwahudumia vizuri Wanarufiji ni kuwahudumia vizuri Watanzania. Vifusi hivi vinawapa tabu Wananchi wangu kwani vinasababisha ajali. Ninawapa siku tatu kazi hii iwe imefanyika kikamilifu.” Alisema.

Katika hatua nyingine, Sawala amekagua ujenzi wa (roundabout) ya Nyamwage na barabara ya Nyamwage utete mita 700 inayosimamiwa na TANROAD Mkoa wa Pwani  na kumtaka Mkandarasi kujenga mradi huo kwa kuzingatia hali ya hewa ili kuepuka kukwama kwa mradi   kutokan na mvua zinazotarajiwa kunyesha. Mradi huo umegharimu jumla ya shilingi milioni 974,427,620.50 na unatarajiwa kukamilika kwa muda wa miezi sita kuanzia tarehe 12/1/2021 mpaka tarehe 12/6/2021

Sawala amemtaka mkandarasi huyo kuhakikisha anatoa ajira kwa Vijana wa maeneo ya mradi ili wanufaike kwani nao ni miongoni mwa walinzi wa mali na mradi kwa ujumla.

Naye Mwenyekiti wa Halmashauri Juma Ligomba ameeleza changamoto ya daraja linalopeleka maji kwa wananchi kipindi cha mvua na kuwaomba TANROADS kuona namna watakvyowaepusha Wananchi wanaoishi eneo hilo. Pia amewataka kufanya kazi usiku na mchana ili kuhakikisha mradi huo unakamilika kwa wakati uliopangwa.

Kwa upande wake Bwana Sholla Sanga ( Road Inspector) amesema hali ya mradi mpaka sasa ni asilimia 20% . “ pamoja na kuwa mradi ulisimama kwasababu ya mvua mpaka sasa umefikia asilimia ishirini na utakamilika kwa wakati.” Alisema