MTR, MCHENGERWA WATOA MSAADA WA MADAFTARI KWA WANAFUNZI KUSAPOTI ELIMU RUFIJI

Posted on: January 13th, 2025

Kikundi cha Wasomi Wilayani Rufiji kinachofahamika kwa jina la Mchengerwa Tumaini la Rufiji maarufu 'MTR' kwa Kushirikiana na Mbunge wa Jimbo la Rufiji Mhe. Mohamed Mchengerwa wametoa msaada wa madaftari 35,000 kwa ajili ya Wanafunzi wa darasa la kwanza katika Shule mbalimbali za Msingi Wilayani Rufiji.

Msaada huo umetolewa leo Jumatatu Januari 13, 2025 katika Shule ya Msingi Mapinduzi iliyopo Kata ya Utete, huku wakisisitiza Wazazi kuweka mkazo katika kusomesha Watoto ikiwa ni sehemu ya Mapinduzi ya kifikra ya kuinua kiwango Cha elimu Rufiji.

"tumeleta madaftari elfu thelethini na tano sawa na katoni 275, ili kumsapoti Mbunge Mchengerwa katika jitihada za kuinua kiwango cha elimu Rufiji... kwahiyo Kwa mwaka huu kwa  kushirikiana na Mbunge tunataka Watoto wote wa darasa la kwanza Wilaya nzima wapate nyenzo za kutumia darasani" Alisema Juma Kiolobele Mwenyekiti wa MTR.

Kwa mujibu wa Kiolobele alisema Mhe. Mchengerwa huwa anasisitiza sana suala la elimu hasa kwa kuawataka Wazazi kuwasomesha Watoto wao Kila anapozungumza na Wananchi wa Rufiji katika Mikutano yake mbalimbali huku huku akitamani kuiona Rufiji ikipiga hatua kielimu.

Kwa upande wake Makamu Mwenyekiti wa Halmashauri ya Wilaya ya Rufiji Mhe. Ally Ndungutu, alitoa shukrani kwa Kikundi hicho kwa msaada wa Madaftari huku akiendelea kutia mkazo kwa Wazazi kuwapeleka Watoto Shuleni ili wapate elimu.