MRADI WA KILIMO CHA PAMBA WAZINDULIWA RUFIJI.

Posted on: January 13th, 2024

Mkuu wa Mkoa wa Pwani, Abubakar Kunenge amewataka Wanachi wa Rufiji kuchangamkia fursa ya kulima kilimo cha Pamba kwa kuwa zao hilo litakwenda kusaidia kukuza kipato chao.

Kunenge ameyazungumza hayo jana Januari 13, 2024 kwenye hafla ya uzinduzi wa mradi wa kilimo cha Pamba ambao upo chini ya uwekezaji wa Kampuni ya ‘RUFIJI COTTON LTD’ iliyofanyika katika Kijiji cha Chumbi A, Kata ya Chumbi Wilayani Rufiji.

“Mwekezaji amesema kiwanda atakachojenga uzalishaji wake hautoshelezi na nyie ndio Soko,  na wengi ambao tumepata matatizo huko nyuma ni kwasababu ya masoko. Mimi naamini kupitia kilimo cha Pamba maisha yenu yanakwenda kutabadilika, kwasabau unalima na unauza hapohapo”.

Pia RC Kunenge amesema  juhudi zinazofanywa na Serikali za kuweka sera na mazingira mazuri ya uwekezaji ni kuona Mwananchi wa chini anaguswa na miradi kama hiyo  na ananyanyuka kiuchumi.

Akizungumzia hali ya uwekezaji, Mkurugenzi Mkuu wa Kampuni ya uwekezaji wa Pamba Rufiji ‘Rufiji Cotton Ltd’ Hassan Kaunje, amesema wameamua kuwekeza Rufiji kwasababu ya mazingira mazuri ya Wilaya ya Rufiji na mapokezi mazuri ya Wananchi wa Chumbi pamoja na Serikali.

“tumekuja kulima na Wanarufiji sio kununua pamba, tunaanza kulima nao katika hatua ya kwanza, ndio maana Mhe. Mkuu wa Mkoa mbele yako unaona vifaa vya kilimo matrekta, madawa na pikipiki. Kwahiyo huduma za kilimo za matrekta na kila kitu zitalipiwa na Kampuni ya Rufiji Cotton Ltd.

Tumeajiri Maafisa Ugani 24 watakaoenda katika vijiji vyote 24 vitakavyolima Pamba, tumewapa na Vifaa (pikipiki). Itakapofika mwezi wa sita mwaka huu tutakuwa na Kiwanada cha kuchambua Pamba ambacho kitajengwa katika Kijiji cha Chumbi na baada ya kumaliza tutaichukua Pamba na kuipeleka India kwenye Viwanda vyetu” amesema Kaunje.

Kwa upande wake Mkuu wa Wilaya ya Rufiji, Meja Edward Gowele amesema kwa Kushirikiana na Bodi ya Pamba Wamepita katika Vijiji vyote 24 kuhamasisha kilimo cha Pamba hali anayoamini italeta matokea chanya kutokana na muitikio mzuri wa Wananchi huku akiwahakikishia Wawekezaji kuwa Rufiji ni sehemu salama na ina maeneo mazuri ya uwekezaji.

“Mimi ni kuhakikishie Wilaya hii ipo salama sana, hata Wawekezaji wanaokuja tumewakikishia usalama wao na Watawekeza katika mazingira ambayo ni salama, niombe pale Mtakapopata Wawekezaji wengine naomba Mtuletee Rufiji, sisi tumeamua tuunge mkono juhudi za Rais za kusapoti uwekezaji” amesema Gowele.

Akitoa salamu za Wananchi Diwani wa Kata ya Chumbi Ally Nguyu amesema Wananchi wa Chumbi kwa umoja wao  kwenye vikao vya ndani na mikutano mikuu ya Vijiji walikubali kutoa hekari 6000 kwa ajili uwekezaji.

“Wanachumbi hawa kwa umoja wao Chumbi A, B na C kwa umoja wao kwenye Vikao vya ndani na Mikutano mikuu wa Vijiji waliridhia kutoa hekari 6000 kwa muwekezaji huyu. Niwaombe Wanachi wenzangu wa Chumbi na Rufiji yote tuungane kwa pamoja kama neema ndio hii” amesema.

Mkurugenzi Mkuu wa Bodi ya Pamba Marco Mtunga amewapongeza Wananchi wa Chumbi kwa kumkubali muwekezaji huyo huku akibainisha kuwa ziara ya Rais India ndio imekuwa chachu kwa muwekezaji huyo.