MKURUGENZI RUFIJI KUKABIDHIWA SHULE MPYA

Posted on: November 13th, 2020

Mkurugenzi Mtendaji wa Halmashauri ya Wilaya ya Rufiji Ndg. Rashid Salum Salum amekabidhiwa Shule Mpya na Mkurugenzi wa Taasisi ya African Relief iliyojengwa kwa msaada wa watu wa Kuwait chini ya usimamizi wa taasisi hiyo. Tukio hilo limeshuhudiwa na Balozi wa Kuwait nchini Tanzania ambaye aliambatana na mwenyeji wake Mkuu wa Wilaya ya Rufiji Luteni Kanali Patrick Sawala pamoja na Wananchi wa Kitongoji cha Kanga, Kijiji cha Chumbi C, Wilayani humo. Shule hiyo imejengwa kwa lengo la kusaidia Wanafunzi wa  elimu ya Msingi ambao walikuwa wakilazimika kutembea umbali mrefu kufika Shuleni.

Akizungumza na Wanachi pamoja na Wageni Mbalimbali waliohudhuria tukio hilo, Mkuu wa Wilaya amemshukuru Balozi wa Kuwait nchini Tanzania kwa kuhudhuria  tukio hilo na kuacha majukumu mengine ya Kitaifa. Pia amemshukuru kwa msaada unaotoka kwa moja ya Wananchi wa Kuwait na kuchagua Tanzania hususani Rufiji kuwa sehemu ya kutoa msaada huo.” Hii inaonesha ni jinsi gani Serikali ya Tanzania chini ya Rais wetu Dkt. John Pombe Magufuli inamahusiano mazuri na mataifa mengine” Alisema.

Aidha ametumia fursa hiyo kuwashukuru Wananchi na Kuwapongeza kwa kuendesha uchaguzi uliokuwa wa amani na utulivu mkubwa na kuwataka Wanachi hao kuendeleza amani hiyo ili kuweza kujikita katika mambo ya kimaendeleo. “ kama alivyosema Mhe. Rais kuwa uchagiz umekwisha na sasa tuchape kazi” Alisema.

Sambamba na hayo amemuagiza Mkurugenzi Mtendaji wa Halmashauri ya Wilaya Rufiji kusimamia Usajili mapema ili kufikia januari wanafunzi wa Kitongoji hicho waanze kusoma katika Shule hiyo. Pia amewataka Wazazi na Walezi wenye watoto waliotimiza umri wa kuanza Shule kuhakikisha Wanawaandikisha watoto wao mapema iwezekenavyo.

Kwa upande wake Balozi wa Kuwait nchini Tanzania ameahidi kuendelea kushirikiana na Serikali ya Tanzania hasa Wilaya ya Rufiji na kuongeza kuwa ataendelea kushirikiana na Mkuu wa Wilaya ili kuendelea kutatua changamoto zinazoikabili Wilaya hiyo.

Naye Mkurugenzi Mtendaji wa Taasisi ya African Relief amesema bado taasisi yake itaendelea kuichagua Rufiji kuwa sehemu ya kushirikiana na Wananchi kutatua changamoto kama ilivyokuwa hapo awali.

Pia Mkurugenzi Mtendaji wa Halmashuri ya Wilaya ya Rufiji Ndg. Rashi Salum Salum ameishukuru Taasisi ya African Relief kwa kuendeleza ushirikiano na kutoa misaada kwa Wananchi wa Rufiji hususani wale waliokatika mazingira magumu zaidi na kuahidi kuwa kwa Shule hiyo aliyokabidhiwa atasimamia usajili kwa haraka kama alivyoagizwa na Mkuu wa Wilaya.