MKANDARASI BARABARA YA NYAMWAGE UTETE ATAKIWA KUKESHA BARABARANI KUREKEBISHA BARABARA

Posted on: May 7th, 2024

Mkuu wa Wilaya ya Rufiji Meja Edward Gowele amemtaka mkandarasi wa barabara ya Utete- Nyamwage kuhakikisha anafanyakazi usiku na mchana ya kufanya marekebisho ya maeneo yote korofi yanayokwamisha usafiri ili aweze kutatua tatizo hilo kwa haraka na wakati. 

Mhe. Gowele ametoa agizo hilo jana Mei 7, 2024 katika eneo la tukio Nyamwage,  wakati akielekea Utete akitokea Ikwiriri, baada ya kushuhudua gari lililobeba kuni ikinasa na kufunga barabara huku magari ya abiria yakisubiri jitihada za kutoa gari hilo ili yaweze kupita.

“kama serikali tumeshatoa maelekezo kwa Mkandarasi kwamba hii Barabara ipitike, nimeshamuagiza Mtu wa TANROAD ahakikishe Mkandarasi anakuwepo hapa muda wote masaa 24. Maoperator wawepo hapa, inapotokea changamoto waweze kutatua kwa haraka na kwa wakati” alisema Gowele.

Gowele aliongeza kwa kusema Barabara hiyo inayotarajiwa kujengwa kwa kiwango cha lami imeshakabidhiwa kwa mkandarasi kwa ajili ya kuanza ujenzi na fedha imeshalipwa.

“hii Barabara wamekabhiwa muda mrefu na fedha wameshapewa ni wajibu wao kuhakikisha Barabara inapitika muda wote” aliongeza DC Gowele.

Kwa upande wake, Injinia kutoka Wakala wa BarabaraTANROAD Mkoa wa Pwani Evans Kamwaga, amesema wameshaanza kurekebisha eneo hilo kwa kuanza kuweka mawe, huku akiahidi kuyafanyiakazi maelekezo ya Mkuu wa Wilaya ya kumtaka mkandarasi anarekebisha vipande vyote korofi katika Barabara hiyo kwa kufanyakazi masaa 24 (usiku na mchana).

“mpaka sasa tumeweza kutafuta mawe ambayo Mkandarasi anayashughulikia kuyaleta, yatasaidia kurudisha mawasiliano ya Barabara Utete-Nyamwage. Tunamshukuru Mkuu wa Wilaya kwa ushirikiano ameweza kutusaidia kutupa kibali cha kupata mawe ili kurejesha mawasiliano katika Barabara hii” alisema Injinia Kamwaga.

Usisahau kutembelea Www.rufijidc.go.tz na Youtube channel ya Halmashauri ya Wilaya ya Rufiji.