Mfuko wa Jimbo Rufiji ulivyopunguza adha ya Wanafunzi kutembea umbali wa km7 Kufuata Shule Muhoro.

Posted on: February 19th, 2024

Yametimia. Ile shida na tabu iliyokuwa inawatesa Wanafunzi wa darasa la awali na la kwanza ya kutembea umbali wa takribani Kilomita 7 kutoka kitongoji cha Nyandote (mashambani) Kijiji cha Muhoro Mgharibi mpaka shule ya Msingi Muhoro ,kata ya Muhoro Wilayani Rufiji Mkoani Pwani sasa imekwisha baada ya kujengewa kituo shikizi cha Haidali chenye madarasa mawili, ofisi na matundu ya vyoo kupitia Mfuko wa jimbo la Rufiji.

Shughuli kubwa ya Wakazi wa eneo hilo ni kilimo cha Mahindi, mpunga, ndizi pamoja na Ufugaji.

Tatizo la umbali mrefu kwa watoto wadogo  liliigusa mfuko wa jimbo la Rufiji ambao upo chini ya Mbunge Mhe. Mohamed Omary Mchenhgerwa kwa kujenga shule shikizi ya Haidali yenye madarasa mawili, ofisi na matundu sita ya vyoo yenye thamani ya shilingi milioni 38.6 kwa ajili ya kuwapunguzia adha watoto hao ambao wengi wao ni darasa la awali na darasa la kwanza.

Akizungumzia namna mfuko wa jimbo  ulivyoigusa jamii hiyo baada ya kamati ya mfuko wa jimbo kuitembelea shule, Makamu Mwenyekiti wa Mfuko huo Hassan Mpange, amesema mpaka sasa shule imeshakusanya Wanafunzi 90 wa darasa la kwanza na Wananfunzi 40 wa darasa la awali.

“shule ya Haidali leo imekamilika, leo Wanafunzi Wanasoma, hawaendi umbali mrefu ambao mwanzo walikuwa wanatembea umbali wa kilometa 7” amesema.

Ameongeza kuwa ujenzi wa madarasa hayo ilikuwa ni ushawishi wa Mbunge wa jimbo la Rufiji ambaye sasa ni Waziri wa TAMISEMI Mhe. Mohamed Mchengerwa baada ya kuona Wanafunzi wanapata shida ya kutembea umbali mrefu.

Wanafunzi katika Kitongoji hicho walikuwa wanalazimika kuvuka mabonde ya maji na kupita sehemu zenye miinuko mpaka kufika shule ya Msingi Muhoro.

Mwenyekiti Muhoro Mashagharibi azungumza.

Akisimulia mchakato ulivyoanza wa kuianzisha shule hiyo Mwenyekiti wa Kijiji cha Muhoro Magharibi Amini Ally Mnyimwa amesema shule hiyo iliibuliwa na Jumuiya ya Wazazi CCM baada ya kuona Wanafunzi wanatembea umbali mrefu, hivyo lilifanyika kongamano la kuhamashisha ujenza wa shule hiyo na viongozi mbalimbali waliunga mkono na kutoa michango yao.

“viongozi mbalimbali walitoa ahadi zao kwenye kongamano na ahadi zao zilikamilika, tukaanza huu mchakato kama Halmashauri ya serikali ya kijiji, tulichimba msingi mpaka katika hatua ya jamvi” amesimulia Mnyimwa.

Aliongeza kuwa masikitiko yao waliyepeleka katika mfuko wa jimbo ambapo ndio wameimaliza tatizo hilo na sasa Wanafunzi wanasoma.

“mara ya kwanza tulipokea milioni 26, 500,000 baada ya hapo kukawa na mapungufu ya umaliziaji wa hili jengo tukaongezwa tena milioni 12, 000,000” aliongeza.

Mbali na hayo amemshukuru Mbunge wa Jimbo la Rufiji na Waziri wa TAMISEMI Mhe. Mohamed Mchengerwa kwa juhudi za ujenzi wa shule hiyo.

“tunaushukuru sana mfuko wa jimbo na Mbunge Mchengerwa kwasababu unapotawala watu lazima uweke alama” alisema.

Mbali na hayo pia Mnyimwa alizitaja baadhi ya changamoto ya shule hiyo kuwa ni madawati, meza na viti vya Walimu, Walimu, Kisima cha maji na barabara.

Awali Makamu Mwenyekiti wa mfuko wa jimbo wa Halmashauri ya Wilaya ya Rufiji Hassan Mpange aliwashauri Wazazi kutuma maombi ya changamoto zilizopo katika shule hiyo na waziwasilishe katika mfuko jimbo ili ziweze kufanyiwa kazi.

Mtendaji Kata ya Muhoro azungumza.

Kwaupande wake Mtendaji kat ya Muhoro ambaye akizungumza kwa niaba ya Diwani wa kata hiyo Hilda Kuboja alisema mfuko wa jimbo Wilya ya Rufiji imegusa katika kila kijiji kati ya vijiji 6 vilivyopo kata ya Muhoro.

“shule hii ya Haidali kwa asilimia 95 imejengwa na mfuko wa jimbo, ulileta shilingi 38, 600,000 milioni ambayo imemaliza madarasa mawili, ofisi na matundu 6 ya vyoo. Watoto walikuwa wanatembea umbali mrefu mpaka kufuata shule nyingine na hapo katikati kuna mabonde na madimbwi ya maji kwahiyo wale watoto wadogo walikuwa wanabaki majumbani” alisema Kuboja.

Amesema hiyo ilikuwa inachangia Wanafunzi kuanza shule wakiwa na umri mkubwa kutokana na hali ya hewa na hali ya barabara.

“lakini kuwepo kwa shule hii iliyoasisiwa na Mbunge (Mchengerwa) mpaka sasa tunao wanafunzi wa darasa la kwanza 90 ambao wameandikishwa kwenye shule hii na Wanafunzi wa darasa la awali 40.

Tunashukuru sana kwa namna shule hii ilivyokuwa msaada” ameshukuru.