MENEJIMENTI YA MAAFA KUTOKA OFISI YA WAZIRI MKUU YAIKIMBILIA RUFIJI.

Posted on: April 8th, 2024

Idara ya Menejimenti ya Maafa kutoka Ofisi ya Waziri Mkuu, Sera, Bunge na Uratibu imetoa tani 20 (sawa na magunia 225) za Mahindi, ndoo 300, blanketi 510, neti 520 na mahema makubwa manne, kwa ajili ya kutoa msaada kwa waathirika wa mafuriko ya maji yaliyofunguliwa katika mradi wa umeme wa Julius Nyerere JNHPP, hali iliyopelekea Wananchi kuhama mabondeni.

Msaada huo umewasilishwa na kupokewa jana Aprili 7, 2024 katika Ofisi za Chuo cha Maendeleo ya Wananchi FDC, na Katibu tawala Mkoa wa Pwani Rashid Mchata kwa niaba ya Mkuu wa Mkoa huo baada ya kutoa taarifa katika Ofisi ya Waziri Mkuu, Idara ya Menejimenti ya Maafa, huku akiwapongeza Viongozi wa Rufiji kwa namna wanavyoshirikiana kupunguza athari kwa Wananchi baada ya Mafuriko. 

Kwa upande wake, Naibu Kamishina Hamisi Lutengo, kutoka Ofisi ya Waziri Mkuu Sera, Bunge na Uratibu Menejimenti ya Maafa, amesema watoa msaada huo baada ya kupokea taarifa kutoka katika Ofisi ya Mkuu wa Mkoa wa Pwani.

“katika taarifa tuliyoipata, kwa uharaka tumeleta vifaa na Chakula kama mahitaji muhimu kwa wahanga. Tumeleta tani 20 za Mahindi, ndoo 300, banketi 510, neti 520 na mahema makubwa manne” alisema Lutengo.

Akitoa Shukurani baada ya kupokea msaada huo, Mkuu wa Wilaya ya Rufiji Meja Edward Gowele alisema “kwa niaba ya Wilaya tunashukuru sana kwa kuweza kutufikishia, na tutausimamia kwa uaminifu kuhakikisha kwamba wanaopata Chakula hiki ni wale walengwa” alisema DC Gowele.