KAMATI ZA MAAFA ZA VIJIJI, VITONGOJI, KATA ZATAKIWA KUFANYA TATHIMINI YA MAZAO YALIYOATHIRIKA NA MAJI MASHAMBANI

Posted on: March 24th, 2024

Kamati ya Maafa ya Wilaya ya Rufiji, imefanya kikao na Wajumbe wa Kamati za Maafa za Vijiji, Vitongoji pamoja Kata katika Kata ya Ikwiriri Tarafa ya Ikwiriri, ambapo Wamewataka Wajumbe hao kufanya tathimini ya mazao na mifugo iliyoathirika baada ya maji yaliyofunguliwa katika mradi wa kufua umeme wa Julius Nyerere kuingia mashambani.

Akizungumza kwa nyakati tofauti Jana machi 23, 2024, na Wajumbe hao Katika ofisi za Kata ya Umwe, Ikwiriri na Mgomba,  Katibu wa Maafa na Afisa Mipango Semeni Mbigo, amesema wanafanya tathimini ili kupata takwimu halisi ya namna maji hayo yalivyoathiri Wakulima wa Rufiji kuanzia mazao, mifugo na makazi.

“ tunataka tujue mimea, mimea ipi ambayo imeathirika? idadi ya mimea,  idadi ya mifugo pamoja na makazi” alisema mbigo.

Aliongeza kwa kuwataka Wajumbe hao kuwa waaminifu wakati wa kufanya tathimini huku akikemea  tabia ya kufanya upendeleo katika zoezi hilo.

Mpaka sasa Kamati hiyo imeshatembelea na kufanya kikao na Wajumbe katika kata 6, Chumbi, Mohoro, Mbwara, Ikwiriri, Umwe na Mgomba, zoezi hilo litaendelea katika Kata zilizobaki.

Kwa upande wake, Mratibu wa Kamati ya Maafa Wilaya, Nurudini Mkumbugo amewata Wajumbe kufanya kazi hiyo kwa Kushirikiana ili kufanikisha jambo hilo.

“naomba tushirikiane tufanye hizi kazi, tunataka kujua Mkulima huyu amelima mazao ya aina gani, hekari ngapi, lakini pia mifugo (idadi ya mifugo iliyoathirika) na Makazi (sio madungu) kwasababu maji haya kuna maeneo yamefika kwenye makazi ya Watu” amesema.

Katika hatua nyingie, Mkuu wa Jeshi la Zimamoto na Uokoaji Wilaya ya Rufiji ambaye pia ni MJumbe wa Kamati hiyo, Inspekta Henry Mwaluseke, ameendelea kuwasisitiza Wananchi kuendelea kuhama maeneo ya mabondeni kwasababu maji yataendelea kufunguliwa mpaka may 25, mwaka huu, kutokana na ujenzi katika bwawa bado unaendelea.