KAMATI YA SIASA RUFIJI YARIDHISHWA NA UTEKELEZAJI MIRADI YA MAENDELEO

Posted on: July 13th, 2024

Kamati ya Siasa ya Wilaya ya Rufiji, imefanya ziara ya ukaguzi wa miradi mbalimbali inayotekelezwa na serikali huku ikionesha kuridhishwa na kasi ya ujenzi wa miradi hiyo, ukiwemo ukarabati wa majengo chakavu ya hospitali ya Wilaya ya Rufiji (Utete) inayo inagharimu milioni 900 kutoka serikali kuu.

"ukarabati huo unahusisha, jengo la Wagonjwa wa nje, jengo la upasuaji, jengo la maabara, jengo la wodi ya Wanawake, jengo la CTC, jengo la kifua kikuu, jengo la huduma ya Afya, mama na Mtoto, jengo la Wazazi, pamoja na ukarabati wa korido" alibainisha Mganga Mkuu wa Wilaya ya Rufiji Dkt. Hamis Abdallah wakati akisoma taarifa kwa Kamati ya siasa ya Wilaya.

Amesema ujenzi huo utakapokamilika utasaidia kubadili mandhari ya hospitali kuwa ya Kisasa na kuongeza morali ya Watumishi kufanya kazi.

Ziara hiyo imefanyika leo Alhamisi  Julai 13, 2024, iliyolenga kukagua miradi ya maendeleo inayotekelezwa na Serikali katika Wilaya ya Rufiji ambapo Kamati hiyo ilimpongeza Mkandarasi kwa namna anavyoendelea kujenga kwa viwango huku wakimtaka aongeze kasi.

"hii sehemu ni sehemu muhimu sana kwa maisha ya Wanadamu, kwahiyo ni vizuri ukaongeza kasi ili Wananchi wapate huduma" alisema Rajabu Mbonde Mwenyekiti wa CCM Wilaya ya Rufiji.

Mradi Mwingine walioukagua ni mradi wa jengo la Mama, Baba na Mtoto lilijengwa katika Kijiji cha Mbwara Kata ya Mbwara lenye thamani ya Shilingi milioni 50 kutoka mapato ya ndani.

Pia walikagua ujenzi wa Ofisi ya Afisa Mtendaji Kata ya Chumbi inayojengwa Kijiji cha Chumbi A,yenye thamani ya shilingi milioni 30 ya mapato ya ndani ya Halmashauri ya Wilaya ya Rufiji.

Mkuu wa Wilaya ya Rufiji Meja Edward Gowele, alitumia ziara hiyo kuwataka Mafundi ambao ni Wazawa wa Rufiji kuendelea kujifunza kwa Wakandarasi wanaojenga miradi mbalimbali ya serikali, ili kuongeza ubunifu na kiwa bora zaidi.

Vilevile Kamati hiyo ilikagua Ujenzi wa Shule mpya ya Sekondari ya Kata ya Mohoro inayojengwa katika Kijiji cha Kiwanga yenye thamani ya shilingi milioni 529, ambao utasaidia kuwapunguzia adha Wanafunzi zaidi ya 400 kwenda kufuata shule umbali mrefu Mohoro Sekondari.

Mbali na miradi hiyo, walitembelea mradi wa Shule shikizi Kindwitwi ikiyopo katika Kitongoji cha Kindwitwi Kata ya Chemchem ambayo itasaidia Wanafunzi na Wakazi wa Kata ya Chemchem ya kupunuza adha ya kutembea umbali mrefu kufuata shule.