DC SAWALA NA MCHENGERWA WASIKILIZA KILIO CHA WAKULIMA WA UFUTA NA KOROSHO RUFIJI.

Posted on: January 8th, 2021

Mkuu wa Wilaya ya Rufiji Luteni kanali Patrick Sawala ameungana na Mhe. Mohamed Mchengerwa Mbunge wa Rufiji, kusikiliza kilio cha Wakulima wa zao la ufuta na korosho Wilayani humo juu ya kutokuwa na imani na chama kikuu cha Ushirika Mkoa wa Pwani ( CORECU) na kueleza dhamira yao ya kujitoa katika chama hicho ili kuunda kingine kitakacholeta ushindani na kupelekea kuboresha maslahi ya Wakulima wa mazao hayo.Akizungumza na Wakulima hao, Sawala amesema hakuna sababu ya Wakulima kukata mikorosho yao na kubadilisha aina hiyo ya kilimo badala yake uongozi wa Wilaya utayafanyia kazi malalamiko yao. “ Hakuna sababu ya kukata mikorosho shambani kwa sababu ya kushuka kwa bei ya zao hilo, korosho ni dhahabu ya kijani na Mvumilivu hula mbivu. Zile korosho zitatutoa. Mimi nitashirikiana na viongozi wenzangu kuhakikisha tunapata ufumbuzi wa changamoto hizi.” Alisema.Pia amewataka Viongozi wa vyama vya msingi wanaodaiwa na Wakulima kuhakikisha wanalipa fedha za wakulima vinginevyo mali zao zitataifishwa.”Ninawataka viongozi wa vyama vya msingi vinavyodaiwa kulipa fedha za Wakulima vinginevyo tutataifisha kilakitu.”Alisema.Sambamba na hilo amewataka maafisa kilimo kuwasaidia Wakulima kwa moyo pamoja na chamgamoto wanazopitia na kuiomba halmashauri kuchukua hatua za makusudi kuwanunulia pikipiki maafisa kilimo kata ili kurahisisha utendaji wao kwa wakulima katika kata zao..”Ona moyoni mwako kuwa unawajibika kuwasaidia wakulima pamoja na changamoto mnazopitia.” Alisema.Aidha Sawala amewataka wakulima hao kufanya kazi kwa ushirikiano na kuhakikisha kuwa wanaongeza vyama vya msingi ili kuwa na vyama vya ,msingi vingi vitakavyowezesha kukidhi vigezo na kuleta ushawishi wa kuunda chama kingine kinatakachoipa CORECUchangamoto. “ mimi pia sifurahishwi na namna ambavyo CORECU inaendesha mambo yake. Hatuna sababu ya kutoanza minada ya korosho kwa wakati pindi Korosho zetu zinapokuwa tayari, Suala la vifungashio kununua nje wakati tunaweza kutumia viwanda vyetu vya ndani. “ AlisemaNaye Mhe. Mohamed Mchengerwa (Mbunge), amesema kuwa, umefikia wakati Rufiji kuamua kujitoa na kuungana na Wilaya za jirani kuunda ushirika mwingine ili kuepukana na malalamiko mengi sana ya Wakulima yanayosababishwa na CORECU. “ Hatuwezi kukubali kuendelea na CORECU kwani ina malalamiko mengi sana ambayo ni aibu hata kwa serikali yetu ambayo inafanya jitihada kubwa kuwasaidia wakulima. Muda umefika tumeamua kujitoa. Tukitoka tukaanzisha chama chetu kingine tutaweza kuongeza ushindani na tutafanya vizuri. Serikali itaongeza mapato na wakulima wataneemeka. Afisa Ushirika naomba shughulikia hilo, pale ambapo tutashindwa mimi nitakwenda mpaka kwa Mrajisi Mkuu. Hakuna sababu ya kuzuiliwa.” Alisema.Kwa upande wake Makamo Mwenyekiti wa Halmashauri Mhe. Muharami Mchambwa(Diwani) amesema kuwa atalipeleka katika baraza ombi la kununua pikipiki za Maafisa kilimo kata ili kuboresha huduma kwa Wakulima.Awali, Wakulima walipewa nafasi ya kutaja kero zinazowakabili na kuwafanya wawe katika hali ya kukata tama na kupendekeza suluhisho la kero hizo ambapo walisema kutokana na matendo ya dhuluma za ukatwaji wa tozo zisizofahamika ambazo wanadai mpaka leo, kuwepo kwa mkanganyiko wa upimaji wa ubora wa korosho uliojitokeza kwa Wataalamu wengine kusema bora na wengine kuweka katika kundi B, kutokuwepo kwa usimamizi mzuri wa ghala kuu, utafutwaji masoko wenye vuashiria vya upendeleo pamoja na kuchelewa kwa vifungashio kwa baadhi ya maeneo na kwengine kuwahi badala ya kugawiwa sawa. Kunawanyima imani ya kuendelea na ushirika huo na kupendekeza kujitoa katika ushirika huo ili kujipanga kuunda ushirika mwingine mapema ili kuwahi msimu wa zao la ufuta.Pia wamemuomba Mkuu wa Wilaya pamoja na Mbunge kuwasaidia kufikisha muhtasari wa kikao chao kwa Mamlaka za juu ikiwemo kwa Mkuu wa Mkoa ilikuona adhma yao na kupatiwa msaada.