DC GOWELE: WATOTO WENYE LISHE DUNI WAIBULIWE KUEPUKA UDUMAVU

Posted on: June 14th, 2022

Mkuu wa Wilaya ya Rufiji Meja Edward Gowele amewataka Watendaji wa Kata na Viongozi wenyedhamana kuhakikisha wanatoa elimu kwa jamii ili kutambua, kuibua na kuwasaidia watoto wenye lishe duni kuepuka tatizo la udumavu katika Jamii.

Meja Gowele ameyasema hayo katika Kikao cha tathmini ya Mkataba wa Lishe Robo ya tatu januari hadi Machi kilichofanyika katika ukumbi wa Mazingira (REMP) juni 14. 2022.

" Wapo watu wanawaficha watoto wenye udumavu. Sisi ambao tunadhamana twende tukawaibue. Tukitoa elimu tutaokoa maisha ya watoto katika hjamii zetu." alisema Mhe. Edward Gowele

Aidha amewataka watendaji kuwajibika katika nafasi zao kwa kuhakikisha wanasimamia mazao ya Wananchi yasiharibiwe na Mifugo ili mazao hayo hasa ya chakula yaweze kuchangia katika kupata lishe bora.

" Lishe bora inatokana na chakula hivyo tusimamie mifugo isiharibu mazao".  Alisema Mhe. Gowele

Kwa upande wake Kaimu Mkurugenzi Mtendaji wa ambaye pia ni Mwanasheria wa Halmashauri ya Wilaya ya Rufiji Leah Kimaro amewataka Watendaji kuhakikisha wanatekeleza majukumu ya Lishe kwa mujibu wa mkataba huku akisisitiza kuweka mbele uzalendo katika kuhudumia Wananchi.

Halmashauri ya Wilaya ya Rufiji imeendelea kutekeleza majukumu ya Mkataba wa Lishe ikiwemo kufanya maadhimisho ya siku ya Afya na Lishe Kuanzia ngazi ya Kijiji katika kipindi cha robo ya tatu kwa asilimia mia moja.