DC: GOWELE: MAZINGIRA NI UHAI WETU, NI LAZIMA TUPANDE MITI LAKINI PIA TUITUNZE

Posted on: April 1st, 2022

Mkuu wa Wilaya ya Rufiji Meja Edward Gowele amewataka Wananchi wa Wilaya ya Rufiji kuhakikisha Wanayatunza mazingira kwa kupanda miti na kuitunza badala ya kukata miti ama kuichoma moto hususani wakati wa maandilizi ya mashamba.
Meja Gowele ameyasema hayo leo Aprili 1. 2022 wakati wa maadhimisho ya siku ya upandaji miti Kitaifa ambapo kiwilaya yamefanyika katika shamba la miti la Halmashauri lililopo katika Kijiji cha Nyamwage kata ya Mbwara Wilayani humo.
“ Mazingira ni uhai wetu, mazingira yakiwa mabaya hatuwezi tukawa salama kwahiyo ni lazima tupande miti na kuitunza.” Alisema Gowele.
Pia amepongeza jitihada za Halmashauri kumiliki shamba la miti hekari 100 na kuliendeleza kwa kupanda miti takribani 3000 swala alilolitaja kuwa ni mfano wa kuigwa na Wananchi katika vijiji vyao Wilayani humo.
Sambamba na hilo, ametoa msisitizo kwa Mkurugenzi Mtendaji wa Halmashauri kuhakikisha agizo la kila mwananfunzi kuwa na mti anaouhudumia shuleni linatekelezwa kwa umahiri Mkubwa huku akisistiza upandaji wa miti ya matunda katika taasisi za Serikali.
Awali akitoa taarifa ya utekelezaji kwa niaba ya Mkurugenzi Mtendaji wa Halmashauri, Afisa Misitu Wilaya ya Rufiji Augenia Majura Seleman alisema  katika kuazimisha siku ya upandaji miti kitaifa, Halmashauri ya Wilaya ya Rufiji ,  imepanda jumla ya miti 3000 katika shamba la miti lenye ukubwa wa hekari 100 linalomilikiwa na Halmashauri katika Kijiji hicho.  
“ katika jitihada za kurejesha uoto uliopotea kutokana na shughuli za binadamu, Wilaya ya Rufiji  inaendeleza jitihada za kuhakikisha inapanda miti katika hekari zote 100.” Alisema 
Aliongeza kuwa, lengo la kushirikisha wanafunzi katika zoezi la upandaji  miti ni kuwa Wanafunzi ni Taifa la kesho, hivyo ushiriki wao katika kupanda miti itawajengea uelewa na uwezo wa kutambua umuhimu wa kuhifadhi misitu na kutunza mazingira kwa ujumla na kutengeneza kizazi ambacho kitaweka jitihada kuthamini utunzaji wa mazingira.
Maadhimisho hayo yalishereheshwa  na washiriki toka  Kamati ya Usalama ya Wilaya, Kaimu Mkurugenzi wa Halmashauri na Wataalamu toka Idara za Halmashauri, wakala wa huduma za misitu Tanzania (TFS), pamoja na kamati ya maliasili kijiji cha Nyamwage, shule ya msingi Nyamwage na Shule ya Sekondari  Nyamwage huku yakiwa yamepambwa na kauli Mbiu isemayo; “Mti wangu, Taifa langu, Mazingira yangu, kazi iendelee.”