DAWA YA PANYA WAHARIBIFU RUFIJI YAPATIKANA

Posted on: November 25th, 2023

Kutokana na Malalamiko ya Wakulima Wilayani Rufiji Mkoani Pwani juu ya Panya kufukua mbegu ya Mahindi kila kukicha, sasa tatizo hilo limepatiwa ufumbuzi baada ya dawa aina ya ‘ZINK FORCE FID’ kugaiwa leo kwaajili ya kupunguza tatizo hilo.

Dawa hiyo iliyochanganywa na pumba za Mahindi, dagaa, pamoja na mafuta imegaiwa leo Novemba 24, 2023 katika ofisi ya Mtendaji Kata ya Utete na kusambazwa maeneo mbalimbali Wilayani Rufiji.

Akizungumza na Wananchi Ramadhani Mahuna, Afisa Kilimo Msaidizi Mwandamizi Kitengo cha Kudhibiti Baa la Panya Morogoro sumu hiyo ni kwa ajili ya Panya wa Mashambani huku akiwataka Wakulima waliopata dawa hiyo kupanda wote kwa pamoja.

“hii sumu ni kali inaua kwa njia ya gesi, kwahiyo unaiweka kidogo kwenye mfuko laini alafu unaifunga, alafu hivi vifuko unavitupa mashambani, hawa panya wakisikia hii harufu ya dagaa wataipenda, sasa wakila ndo inawaua”

Kwa upande wake  Afisa Kilimo Rufiji Nurudin Mkumbugo amesema dawa hiyo ni vizuri iwekwe mashambani wakati wa jioni kuelekea usiku kwa sababu ndio mida ya Panya kufukua Mahindi mashambani.

“mashambani tunaweka kwa namna gani, kama hali ya hewa unaona kama mvua hakuna au unyevu ni mkubwa na tumepangilia labda tuiweke kesho, basi  lazima hii sumu iwekwe kwenye mifuko laini, uhakikishe haiwezi kupitisha hewa wala kutoa hewa kwasababu inaua kwa njia ya gesi maana yenyewe itakuwa inapumua” amefafanua Mkumbugo.

Wakizungumza baada ya kupokea dawa hiyo ya kuulia Panya Mashambani Wananchi akiwemo Zainabu Ndambwe Mkazi wa Kitongoji cha Kiwili Kata ya Utete, ameishukuru Serikali kwa juhudi ilizozichukua baada ya kupokea kero hiyo kwa Wakulima.

“naishukuru Serikali kwa kutuletea Wataalamu wetu kutugea elimu, tumeikubali elimu hiyo na tunaenda kuifanyia kazi” amesema Ndambwe.

Akielezea tabu Wanayoipata Mashambani kutoka kwa Panya hao, Ndulu Kirungi amesema kila wanapopanda Mahindi, panya huwa wanafukua mbegu sehemu ya kubwa ya shamba hali inayowafanya kurudia kupanda mara kwa mara.

Akijibia kero hiyo katika mkutano wa hadhara na Wananchi wa Kitongoji cha Kitapi Kata ya Mbwara Novemba 21, 2023, Mkuu wa Wilaya ya Rufiji Meja Edward Gowele alisema Wataalamu watafika Wilayani Rufiji kwa ajili ya kumaliza tatizo hilo.

“sasa wakija hapa hapa Kitapi, hakikisha unakuja na mafuta, fungu la dagaa na pumba za Mahindi kwaajili ya kuchanganya na dawa” alisema Gowele.