DAS RUFIJI AWATAKA WATENDAJI KUAZIMISHA SIKU YA LISHE KWA WAKATI

Posted on: February 19th, 2021

Katibu Tawala Wilaya ya Rufiji Bi. Maria Katemana amewataka Watendaji wa Kata kuhakikisha wanasimamia Vijiji kutekeleza Mkataba wa Lishe hususani katika uazimishaji wa siku ya lishe ngazi ya Vijiji .” Tupange mikakati ili Vijiji vyote viweze kuazimisha siku ya lishe kwa wakati” Alisema

Ameyasema hayo alipokuwa akifunga kikao cha tathimini ya pili ya Mkataba wa lishe ngazi ya Kata Oktoba hadi Desemba kilichofanyika tarehe 19/02//2021 Utete Rufiji.

Awali akisoma taarifa ya utekelezaji wa Mkataba wa Lishe ngazi ya Kata robo ya pili Oktoba hadi Desemba 2020 Afisa Lishe Wilaya Bi. Mwanahamisi Lyana alizitaja kata ambazo Vijiji vyake havikuazimisha siku ya lishe kwa wakati na kupelekea kuchelewa kwa taarifa za utekelezaji, huku kata ya Mkongo ikiwa haikutekeleza kabisa.

 Aliongeza kuwa Vijiji Vilivyobandika taarifa za lishe ni 37 kati ya Vijiji 38 na Kijiji cha Kipugira kikitajwa kama Kijiji pekee ambacho hakikubandika taarifa hizo katika mbao za matangazo.

Pia ameitaja changamoto ya Baadhi ya Vijiji kutotumia mapato yake ya ndani kuwawezesha Wahudumu wa Afya Vijijini( WAVI) na kutaja Vijiji 11 tu vinavyotekeleza azimio hilo ambavyo ni Mbwara, Nambunju, Kipo, Kipugira, Tawi, Chumbi B, Mgomba Kaskazini, Kitapi,Nyamwage, Ngorongo mashariki, pamoja na Kilimani.

Kufuatia taarifa hiyo, Katibu Tawala amemtaka Mkurugenzi Mtendaji kuhakikisha anasimamia Watendaji ngazi ya Kata na Vijiji ili kuhakikisha Mkataba wa Lishe unatekelezwa kwa kutimiza mahitaji ya Mkataba ili kujenga jamii imara na iliyobora kwa Wilaya na Taifa kwa ujumla. “Tuweke mikakati mizuri ili tuweze kusaidia Taifa la baadae.” Alisema.

Kwa upande wake Kaimu Mkurugenzi Mtendaji Ndg. Geriad Mgoba amesema Vijiji vinatakiwa kuweka suala la lishe kama kipaumbele cha kwanza na kuhakikisha kidogo kinachopatikana kinatumika katika masuala ya lishe.” Nilazima tutumie kidogo tulichonacho na kuweka kipaumbele suala la lishe katika Vijiji vyetu. Watendaj himizeni mikutano na mtoe maelekezo kwa Viongozi wa Vijiji ili kutekeleza mahitaji.” Alisema.