CHUO CHA VETA RUFIJI CHAFUNGULIWA RASMI, WAZAZI WAHIMIZWA KUPELEKA WANAFUNZI

Posted on: July 8th, 2024

Chuo cha Ufundi (VETA) Rufiji, kimefunguliwa rasmi kwa ajili ya kuanza kupokea Wanafunzi kwa mwaka wa 2024-2025 ili kutoa ujuzi kwa jamii inayoizunguka katika fani mbalimbali za muda mrefu na muda mfupi, huku Wazazi Wilayani Rufiji wametakiwa kuchangamkia fursa ya kupeleka vijana wao ili kupata ujuzi utakaowasaidia katika maisha yao.

Chuo hicho kilichojengwa kwa thamani ya Shilingi bilioni 2.6, kipo katika Kitongoji cha Nyandakatundu Kata ya Chemchem Mji Mdogo wa Utete Wilayani Rufiji barabara ya Utete-Nyamwage, kimefunguliwa jana Jumatatu Julai 8, 2024 na Mkuu wa Wilaya ya Kibiti Mhe. Kanali Joseph Kolombo aliyemuwakilisha Mkuu wa Wilaya ya Rufiji, ambaye amewataka Wananchi wa Rufiji na Kibiti kupeleka Wanafunzi ili wapate ujuzi wa fani mbalimbali.

“unapoona fedha serikali imewekeza hapa fedha bilioni 2.6, inalenga vijana wa Rufiji waliomaliza sekondari pamoja msingi waweze kusoma na kupata ujuzi mbalimbali. Mimi binafsi nimechukua kama agenda katika vikao vya nitakavyokuwa nafanya ni Vijana waje kusoma hapa Rufiji” alisisitiza DC Kolombo.

Akitoa taarifa ya Chuo, Msajili wa Wanafunzi wa Chuo cha Ufundi VETA Rufiji Julius Mwakasasa, amesema Chuo kimeshapokea Wananfunzi 14 mpaka sasa ambao wanasomea fani ya umeme, huku akizitaja fani za muda mrefu za mwaka mmoja zinazotolewa chuoni hapo.

“chuo kitakuwa kinatoa fani 6, fani ya mafundi wa ujenzi, uungaji wa vyuma, ubunifu na ushonaji wa mavazi, uwaziri na kompyuta, ufundi umeme wa majumbani na ufundi wa magari. kwa mwaka wa masoma 2024 chuo kimeanza kutoa mafunzo katika fani ya umeme wa majumbani kwa idadi ya Wanafunzi 14 wote wakiwa wakiume, chuo tayari kimeanza kutoa fomu za udahili kwa muhula wa 2025” alisema Mwakasasa.

Amesema kwa mwaka Chuo kitakuwa na uwezo wa kudahili wanafunzi 120 wa jinsia zote wa fani za muda mrefu, huku akibanisha kwa mwaka 2025 chuo kinatarajia kuanza masomo katika fani tatu, ufundi wa ujenzi, ubunifu na ushonaji wa mavazi pamoja na ufundi wa umeme wa majumbani.

Pia alizitaja fani za muda mfupi ambazo ni pamoja na, kompyuta, ufundi wa magari, ufundi wa ushonaji wa mavazi, umeme wa majumbani, ufundi bomba, ujenzi, uungaji wa vyuma, udereva wa pikipiki na bajaji, udereva wa awali pamoja na kozi mbalimbali za ujasiliamali kama vile ufugaji na kilimo.