BOTI MPYA MBILI (2) ZA HALMASHAURI ZAKAGULIWA

Posted on: May 2nd, 2021

Leo Mei 02. 2021 Mkuu wa Wilaya Rufiji Kanali Patrick Sawala ameshiriki Ukaguzi wa Boti mbili ( 2 ) za Halmashauri ya Wilaya ya Rufiji katika Kiwanda cha Songoro Marine Transport Ltd kilichopo Kigamboni Jijini Dar es salaam, ikiwa ni hatua ya mwisho tayari kwa boti hizo kuingia ndani ya Mto Rufiji na kuanza kazi.

Katika ukaguzi huo ameambatana na Mwenyekiti wa Halmashauri Mhe. Juma Ligomba, Kaimu Mkurugenzi Mtendaji Bw. Geriad Mgoba, Mweka Hazina wa Halmashauri Bi. Anthonia Ndawi pamoja na Kamati ya Ukaguzi toka Wilayani.

Boti hizo za kisasa ambazo ni Boti za uokoaji na Boti ya doria, zimegharimu jumla ya kiasi cha shilingi Milioni 90,830,000 za Kitanzania kwa kila boti moja ambapo Boti ya doria inauwezo wa kubeba watu 11 na boti ya uokoaji ina Vitanda 03, siti 03, pamoja na choo kimoja.

Akizungumza baada ya kujiridhisha na ukaguzi huo, Kanali Sawala amemuagiza Mkurugenzi Mtendaji kukamilisha taratibu zote zilizobaki ndani ya wiki ijayo ili taratibu za mafunzo kwa manahodha wa boti hizo na hatimaye sherehe za kukabidhi zianze mapema ndani ya mwezi huu.

“ Watu husema Supu ya Mbwa inanywewa ikiwa ya moto. Naomba taratibu zote zikamilike ndani ya wiki ijayo ili tufanye sherehe ya makabidhiano na Wanarufiji Waanze kuzitumia mapema.” Alisema

Kwa upande wake Mwenyekiti wa Halmashauri Mhe. Juma Ligomba amemshukuru Mmliki wa Kampuni hiyo Bw. Songoro kwa uzalendo aliouonesha kwa kutengeneza boti hizo kwa ubora wa kiwango cha juu pamoja na msaada alioutoa kwa Wanarufiji kwa kutoa Kitanda kimoja cha kusafirishia boti bila gharama yoyote.

” Kwakweli hatuna budi kukushukuru kwa niaba ya Wanarufiji. Hakika umetuonesha upendo mkubwa na uzalendo wa hali ya juu sana.” Alisema.

Akizungumza Kwa niaba ya Mkurugenzi Mtendaji, Mwenyekiti wa Kamati ya ukaguzi na Kaimu Afisa mifugo na Uvuvi Wilaya Bw. Salim Msangi amesema, boti hizo za kisasa licha ya kutumika na idara yake kwa shughuli za doria na uokoaji, Boti hizo zitakwenda kutoa huduma kwa Watalii wan je na wandani, kukodisha kwa shughuli mbalimbali, na kuongeza nguvu kwa usafiri wa majini ambapo zitaongeza kipato na kukuza utalii wilayani Rufiji.