BARAZA LA ARDHI IKWIRIRI KATI LAVUNJWA

Posted on: August 22nd, 2020

Mkuu Wa Mkoa wa Pwani Mh. Eng. Evarist Ndikilo akiwa katika mkutano na wananchi wa tarafa ya Ikwiriri Wilayani Rufiji amevunja baraza la aridhi la kijiji cha Ikwiriri kati kutokana na kuwepo kwa tuhuma hasa za rushwa kwenye utatuzi wa migogoro ya aridhi. tuhuma hizi zilielezwa wazi na Ndg. Hamisi S. Ngwele ambaye ana mgogoro wa ardhi na Bi. Mwashabani Liutike, alisema  kuwa alianza kuutiliashaka mwenendo wa baraza hilo baada ya kusikia maamuzi ya mgogoro huo kuwa Bi. Mwashabani ameshinda na ameipa kamati shilingi laki mbili kabla ya siku ya hukumu ya kesi hiyo.”taarifa hiyo niliipata kutoka kwa mjumbe mmoja wa baraza hilo.  niliposikia niliamua kutoa taarifa kwa ofisi ya Takukuru kwaajili ya uchunguzi na uchunguzi ukaanza lakini cha ajabu baraza limeshatoa maamuzi kuwa Bi. Mwashabani ameshinda. ndipo nilipoamua kukata rufaa na kuambiwa niende Mkuranga.” Baada ya kusikia hayo, Mkuu wa Mkoa aliagiza ofisi ya Takukuru kutoa uthibitisho juu ya malalamiko hayo na majibu ya uchunguzi ambapo Kamanda wa Takukuru Mkoa alijibu kuwa amewasiliana na Kamanda wa Takukuru Wilaya na amemfahamisha kuwa amechunguza mwenendo wa kesi na kujiridhisha kuwa ni kweli baraza hilo lilijihusisha na kupokea Rushwa hali iliyopelekea kutotendeka kwa haki katika maamuzi ya kesi hiyo. Baada ya kupokea taarifa hizo Mkuu wa Mkoa alitoa maelekezo ya kuvunja baraza hilo na kumuagiza Mkuu wa Wilaya kusimamia uundaji wa baraza jipya kwa kuzingatia sheria. “ Navunja baraza la ardhi ikwiriri kati na nakuagiza Mkuu wa Wilaya kufuatilia uundwaji wa baraza jipya kwa mujibu wa sheria na baraza jipya lipitie kesi hii upya.”